Մարիանո Դիասը երբեք այսքան մոտ չի եղել առաջին թիմ տեղափոխվելուն։ Դոմինիկյան Հանրապետությունը ներկայացնող հարձակվողը Զիդանի սիրելի ֆուտբոլիստներից մեկն էր «Կաստիլյայում», ինչը թույլ է տալիս ենթադրել, որ մոտ ապագայում նա կարող է տեղափոխվել հիմնական թիմ։

Զիդանի՝ առաջին թիմը գլխավորելուց հետո Մարիանոն կարող է դառնալ նրա առաջին «ձեռքբերումը»։ Առավելապես նրա գոլերի շնորհիվ է, որ «Կաստիլյան» հիմա Սեգունդա Բ-ի իր ենթախմբում առաջատարների թվում է։ Զիդանը նախ հաճելիորեն զարմացած էր, իսկ հետո՝ շատ գոհ ֆուտբոլիստի ցուցադրած խաղից, ինչը լուրջ հիմք է, որ Մարիանոյին տեղափոխեն հիմնական թիմ։
Որպեսզի դա իրականություն դառնա, Մարիանոն պետք է պարզապես երկարաձգի պայմանագրի ժամկետը։ Զիդանն, ակնհայտ է, հնարավորություն չի տա մի ֆուտբոլիստի, ով ցանկություն չունի կարիերան շարունակել «Ռեալում», այնպես որ նոր պայմանագրի կնքումը կարևոր նախապայման է Մարիանոյի համար հիմնական թիմում նորամուտը նշել ու մյուս մրցաշրջանում մշտական հիմունքներով այնտեղ տեղափոխվելու համար։ Հիմա Մարիանոն, ով իր կարիերայի հիմնական փուլ մտնելու ճանապարհին է, պետք է որոշի՝ կարիերան շարունակել մեկ այլ ակումբում, որտեղ մշտական խաղային պրակտիկա կունենա, թե՞ տեղափոխվել «Ռեալի» հիմնական թիմ, որտեղ պետք է քիչ-քիչ սկսի ընգրկվել կազմում։
Զիդանը պատրաստվում է լիովին վստահել Կարիմ Բենզեմային, իսկ մեկ այլ հարձակվողի ձեռք բերելը սկզբունքային նպատակ չէ, չնայած որ պահեստային տարբերակ ունենալը չէր խանգարի, ինչպես եղավ Անչելոտիի պարագայում։ Հետևաբար, Մարիանոն կարող է դառնալ այդ պահեստային տարբերակն ու միանալ Զիդանի «նոր» թիմին։ Զիդանն էլ, իր հերթին, գիտի, որ ամբողջ բեռը պետք չէ թողնել Բենզեմայի ուսերին, ու այդ պարագայում նրան օգնության կգա դոմնիկցին։