ЭНДИ ҚАЙТИБ КЕЛМАЙДИ

Ўтди-кетди шўх ёшлик,
Учди-кетди ўқ ёшлик,
Изла, энди йўқ ёшлик,
Энди қайтиб келмайди!
Севганинг дилдор эди,
Оҳ, гўзал бир ёр эди,
Ўртада сир бор эди...
Энди қайтиб келмайди!
Отанг саломат эди,
Онанг саломат эди,
Улар омонат эди...
Энди қайтиб келмайди!
Баҳор эди, ёз эди,
Умр они соз эди,
Ва лекин у оз эди...
Энди қайтиб келмайди!
Дунёга бир бор келдинг,
Улгурмадинг, на билдинг?!
Уч кун ўйнадинг-кулдинг...
Энди қайтиб келмайди!