Шыргыжале кече,эрден эр

Шола шинчажым модыктен
Кечыйол,шуйналте вачышкем
Капем вӱчкалтыш йӧратен
Кынельым мый уеш мален
Капемже йӱдым каналтен
Лектам уремыш шӱлалташ
Илыш пиалым вашлияш
Яндар памаш йӱштӧ вӱдат
Чурийым,шӱялта шыман
Лектам,уеш изи пакчаш
Чыла денат саламлалташ
Вашлийыт,мыйым чыланат
Пеледыш-влак эре вучат
Нӧлталыт вуйыштым рӱжге
Кок-кум гана вуйым савен
Кандалге,кӱшнӧ каваштат
Изи турий моштен мура
Пакча шеҥгелсе пасушкат
Вис-вис погаш мияш кӱшта
Ончет йырваш илыш гӱжла
Мардеж лышташым тарвата
Тӱрлӧ тӱсан изи лыват
Шыман шулдырым модыкта
Шем шырчык йылым кычалеш
Ош пырыс игыж ден модеш
Сур лудо игыжым вӱден
Коремыш вӱдыш ошкылеш
Пеледын чарныш ош сирень
Тудат тюльпаным алмаштен
Пӱртӱсын кугу капкажат
Почалте шокшо кеҥежлан
Пеледыт таче ош вис-вис
Вуйкомдышым кӱлеш пидаш
Мотор йолташлан пӧлӧклаш
Уеш,уеш мотор лияш
Ужарге,нӧргӧ шудо пуш
Шарлалтын кажне верыштат
Солалтын писе сава ден
Олыкыштат,ял пакчаштат
Волгенче чот волгалтара
Кӱдырчӧ ден рашкалтара
Тора,умбалне кавадӱр
Шонанпыл ден сӱретлалтеш
Вучен шуктен ме улына
Эше ик пагытым,ура!
Уеш адак лиеш кеҥеж
Чевер кеҥеж,пиал тӱсан
30.05.2025 г. Леонид Гаврилов