2017-й год у нашай краіне праходзіць пад знакам 135-гадовага юбілею вялікіх пісьменнікаў беларускага народа, класікаў нацыянальнай літаратуры Янкі Купалы і Якуба Коласа. У ДУА “ВПК Лабжанскі дзіцячы сад-сярэдняя школа Клімавіцкага раёна” святкаванню 135-годдзя паэтаў нададзена асаблівая ўвага. Мерапрыемствы, конкурсы, віктарыны, выставы прысвечаныя юбілею песняроў, праводзіліся на працягу года.
Так, настаўніцай беларускай мовы і літаратуры, Валянцінай Федараўнай Шмідавай, падрыхтавана і праведзена інтэлектуальная гульня-конкурс па творчасці класікаў для навучэнцаў старэйшых класаў. Удзел ў гульні прымалі дзве каманды – “Купалінка” і “Каласы”. Капітан каманды “Купалінка” Ігар Новікаў у камандзе сабраў нераўнадушных да творчасці паэтаў сваіх сябраў: Уладзіславу Падабед, Ульяну Талалаеву, Ангеліну Батэнка, Карыну Берасневу, Арцема Курносава. Каманду “Каласы” прадстаўлялі Вадзім Келбусаў – капітан, Яўген Гершанкоў, Кацярына Келбусава, Валерыя Чепікава, Вадзім Кружаленка, Арцем Манетаў.
Интэлектуальная гульня пачалася з верша Янкі Купалы “Спадчына”, які прачыталі гульцы каманды “Купалінка”.
Было абрана журы конкурсу, якое ўзначаліў намеснік дырэктара па вучэбна-выхаваўчай работе – Алеся Міхайлаўна Падабед. Мерапрыемства праводзілася ў форме тэлевізійнай перадачы “Свая гульня”, якая складалася з шасці сектараў: “Цікавыя факты з біяграфіі”, “Паэзія”, “Ліра-эпічныя і празаічныя творы”, “Героі твораў” і “Літаратурная спадчына ў мастацтве”.
Каманды па чарзе выбіралі сектар і давалі разгорнуты адказ на пытанне. А пытанні былі вельмі цікавыя і пазнавальныя.
У канцы мерапрыемства журы аб’явіла вынікі конкурсу. Перамогу атрымала каманда “Купалінка”.
Для навучэнцаў 1–6 класаў бібліятэкар школы Ларыса Іванаўна Саранчук правяла літаратурную гадзіну “Зямлі вялікай голас”. Вучні ў сваіх аповядах расказалі пра жыццевы і творчы шлях Янкі Купалы і Якуба Коласа. Гэта выдатныя майстры апавяданняў, празрыстых па мове і стылю аповесцей. Лірыка Янкі Купалы – гэта лірыка прарока, прадказальніка, перажыванні рэальнага, звычайнага, канкрэтнага чалавека. Якуб Колас – адзін з заснавальнікаў беларускай літаратуры і стваральнікаў беларускай літаратурнай мовы. На працягу свята гучалі музычныя творы паэтаў, а таксама чыталіся вершы.
Атмасфера была вельмі цеплай, а ўражанні ад мерапрыемства засталіся незабыўныя.
Зараз у школьнай бібліятэцы працуе кніжная выстава “Нам засталася спадчына”, на якой вучні маюць магчымасць пазнаеміцца з творчасцю паэтаў.
Янка Купала і Якуб Колас пакінулі вялікую спадчыну, на якой узгадавалася не адно пакаленне, і якая на працягу дзесяцігоддзяў вывучаецца, асэнсоўваецца, перакладаецца на іншыя мовы і пашырае веды пра нас – беларусаў – ва ўсім свеце.
Жанна Уладзіміраўна Новікава, настаўнік пачатковых класаў ДУА “ВПК Лабжанскі дзіцячы сад – сярэдняя школа”.
Присоединяйтесь к ОК, чтобы подписаться на группу и комментировать публикации.
Нет комментариев