Դենվերի իրավապահները ՄաքԴոնալդսի մոտ հետախուզման մեջ գտնվող հանցագործի են նկատել եւ որոշել են ձերբակալել նրան, սակայն պատկերացում անգամ չեն ունեցել, թե ինչ անակնկալ է իրենց սպասվում:

Դենվերի ոստիկանությունում ասում են, որ սպաները փոխադրում էին ձեռնաշղթաներով 32-ամյա Իսահակ Վիգիլին, երբ վերջինը հետույքից ատրճանակ է հանել եւ կրակ բացել իրավապահների ուղղությամբ: Դենվերի շրջանային դատախազության հրապարակած զեկույցում նշվում է, որ Վիգիլը հասցրել է երկու անգամ կրակել:
Դատական նյութերի համաձայն, թմրանյութերի դեմ պայքարի բաժնի աշխատակիցները Վիգիլին ձերբակալել են ՄաքԴոնալդսի ավտոկայանատեղիում, երբ նկատել են, որ նա մետամֆետամին է ծխում: Իրավապահները կապ են հաստատել նաեւ պարեկային ծառայության հետ, քանի որ հետախուզման մեջ գտնվող Վիգիլը հայտնի է եղել «դաժան եւ ագրեսիվ պահվածքով»: Սպաներին անհրաժեշտ է եղել ցանցով մեքենա, որը ձերբակալվածին առանձնացնում է ոստիկաններից:
Ձերբակալվելուց հետո Վիգիլը մի քանի անգամ սպառնացել է սպանել ոստիկաններին, իսկ հետո հայտարարել է, թե ցանկանում էր մեռնել:
FedPost.ru-ի փոխանցմամբ, մեքենա նստեցնելուց առաջ իրավապահները նրան խուզարկել են, սակայն պատկերացում անգամ չեն ունեցել, որ Վիգիլը կարող էր զենք թաքցնել հետույքում: Հանցագործը կրակել է 0.25 տրաչափի Raven P25 Auto ատրճանակից, որից սերիական համարը ջնջված է եղել:
Զեկույցի համաձայն, ձերբակալվածի անակնկալներն այսքանով չեն ավարտվել: Ռենտգեն-հետազոտության արդյունքում Վիգիլի աղիքներում նաեւ 2 տուփ թմրանյութ են հայտնաբերել: