Кредит картаси унинг бўлажак ихтирочиси Фрэнк Макнамара жуда ҳам ноқулай вазиятга тушиб қолганидан, яъни ресторанда тушлик учун пул тўлай олмаганидан сўнг ўйлаб топилган экан.

Икки дўсти билан "ширингина” ўтириш жанжал билан якунланмаслиги учун у хотинига одам юборишга мажбур бўлади, хотини эса уни қутқарган нақд пулларни олиб келади.
Шундай руҳий изтиробни бошдан ўтказган Макнамара универсал кредит китобчани ўйлаб топади (бунгача, XX асрнинг бошларидан кўплаб дўконлар ўзларининг фирма кредит карталарини чиқарар эди, лекин харид учун бир уюм кредит карталари билан юриш харидорлар учун анча мушкул вазифа эди). Кредит китобчаси ёки карточкасини бир хиллаштириш Макнамара ихтиросининг асосий ғояси эди. У ўзининг ўша икки дўсти – Альфред Блумингдейл ва Ральф Снайдер билан бирга "ресторан ишқибозлари”га мўлжалланган кредит карталар билан ишлаш учун воситачилик вазифасини ўтовчи "Diners’ Club” компаниясига асос солади. "Diners’ Club”нинг дастлабки карталари қоғоз-картон кўринишида бўлиб, Нью-Йоркнинг 14 та ресторанларида қабул қилинган. АҚШда карталар 50-йилларда – инфляция авж олган даврда кенг тарқалди.