BU DUNYA (2-BO'LIM)

Bul du'nya "bes ku'nlik", "yalg'anshi" demek,
Buring'ilar aytqan so'zin'de bardi.
"Asig'adi bizden qalg'ansha" demek,
Biyopaliq ku'ler ju'zinde bardi.
Ta'n'irim bul du'nyani joqtan bar etti,
Bendem shalqisin dep, lalazar etti.
Lekin g'apil bende asqinlap ketti,
Ko'binde insap joq, bazinda bardi.
Du'nya dep, adamzat bir-birin qirg'an,
Shaytan g'ulg'ulasi haq joldan urg'an.
Bul jerde jaziq joq du'nyada turg'an,
Ha'r ba'le adamnin' o'zinde bardi.
Bul du'nya yalg'anshi emes shininda,
"Na'psin'di tiy" dep aytqan g'oy burinda.
Bir qisim topiraqqa tolg'an son'inda,
Ash ko'zlik adamnin' ko'zinde bardi.
Ashiq Ayaz, haq jolinan ju'rmese,
Bul du'nyanin' go'zzallig'in ko'rmese,
Bul so'zge waqtinda ma'ni bermese,
Ulli pushaymanlar izinde bardi.