ДЕГ1АСТА

Дег1аста Дег1аста
азаллехь дуьйна хьо х1аллакьян г1ертачу
къизачу ницкъана юьхь-дуьхьал лаьтташ
баккъашца хьан лаьмнийн оганаш нисдеш
турпала баьхначу хьан к1ентийн дуьхьа
Дег1аста Дег1аста
эвхьанна безарийн б1аьра ца хьовсалуш
шовданийн б1аьра уьш хьийсарна ц1анлуш
кийра ц1ийх бузучохь са сирла латто
хьуна ницкъ беллачу йо1арийн дуьхьа
Дег1аста Дег1аста
доллучу дахарехь оьзда юкъ йихкина
набаран кхоьлах а хьуна сагатдеш
доьзалийн вонехь а сада1ар доцуш
хьуна хехь лаьттинчу къонахийн дуьхьа
Дег1аста Дег1аста
нуьцкъала хьох даьхна дуьненчохь даржийна
хьан лаьттахь коша барз хиллачех хьоьгуш
бартхаттар дицделла хьо Деле йоьхуш
эхарта дирзинчу хьан берийн дуьхьа
Дег1аста Дег1аста
азаллехь Дала ша вайн дуьне кхоьллича
стигланаш латтанаш х1иттийна ваьлча
дуьненан 1аламаш нисдина латто
диначу лекхачу хьан лаьмнийн дуьхьа
Дег1аста Дег1аста
маьршачу буьйсанна ламанан тарханаш
шовданийн мукъамехь ойлане техкош
экхано шен к1орни йохъечу хенахь
хьан г1енаш хьоьстучу тийналлин дуьхьа
Дег1аста Дег1аста
Делан шен пурбанца малхо де доладеш
адамийн акхаройн г1ан-набарш хадош
хьан лаьмнийн бердашкахь шахьаршкахь бижина
бода д1атоттучу серлонан дуьхьа
Дег1аста Дег1аста
зингатан дахар а мехала лерина
экханан бакъо а тидаме эцна
маршонца нисдина нийсонца дустуш
тхан дайша кхоьллинчу г1иллакхийн дуьхьа
Дег1аста Дег1аста
Дела ша резаво 1амалаш лелаеш
да-нана резадо доьзалаш кхиош
хьаша-да резаво ц1е кхерчахь латтош
хьан беркат лардинчу х1усамийн дуьхьа
Дег1аста Дег1аста
мостаг1чо кху лаьттахь даха ца дитича
мархашлахь даьхна а са маьрша латто
т1улгаш т1ехь даьхна а дог кура латто
йиначу лекхачу хьан б1аьвнийн дуьхьа
Дег1аста Дег1аста
Дела цхьаъ виначийн ламазаш дебадан
Элча бакъ виначийн ойланаш кхаба
хьан лаьмнаш сирлачу жам1ате кхайкха
диначу дуьххьарчу маьждиган дуьхьа
Дег1аста Дег1аста
Дела бен вала да воцуш хьо хьийзачу
тхан наной хьан къина боьлхучу дийнахь
г1азотехь дуьненан боданаш багош
хьан к1ентий оьгучу доккхачу дийнахь
Дала ларйойла хьо тхан Нана-Дег1аста
1995 шо