* * *

Бир дўст овозини эшитгим келар,
Сиз эса олисда...
хаёллар аро,
Яна ёлғизлигим билгандай,
суйкалиб келади илонлар,
Раъно!
Қўнғироқ қиламан.
Бузилар тинчим,
Олис-олисларда сўнади садо.
Дунёда севги йўқ,
алданишлар бор.
Севгига ўхшаган хато бор, хато!
... Севгим келаяпти, бироқ, кимнидир.
Ким ўша? Билмайман, билмайман, аммо,
Ўз тахтин ўзгага бермаган шоҳдек
Дилдан кетмагани унинг – муаммо.
“Кет!” дейман, кўнглимни тошларга уриб,
Саргардон умримдан топмай ҳеч маъно.
Ҳамма-ҳаммасидан юзимни буриб,
Кетгим келаяпти қайгадир, Раъно!..
Сиз сирли гиёҳсиз.
Бор шундай гиёҳ –
Роббим ўзи билиб яширган имкон.
Ҳатто, арслонлар яраланган чоғ
Баргига суйкалиб топар экан жон...
Аммо Сиз олисда...
Мен эса бунда.
Куйиб кетаяпман бошдин то оёқ.
Ишқ урган телбадай жаҳаннамдаман,
Ўлгим келаяпти шу ишқ билан, оҳ!
Битта япроқ бўлиб юзимни ёпинг,
Жонбахш кўзларингиз ўқисин ёсин.
Юракка босилган қўллардан бошқа
Кўрмадим бу ғариб ишқнинг давосин.
Вужуд занжирларин узиб, парчалаб,
Дил ўзин оловга отмоқда тинмай.
Мен қандай яшайин, бу ўт ичида
Умрим ёнаётган бўлса бутунлай!
Севги бор!
Севги бор! Гўзал бир ишқ бор!
Ишққа мустаҳиқлар яшар экан то.
Ишқ бор!
Аммо У йўқ!
Ва лекин У йўқ!
Кўргим келаяпти мен Уни, Раъно!
... Кўргим келаяпти мен Уни!..
Раъно!..
20.03.09.