"Haş-bir” omə, "en-bir” omə,
Dardı-bəlo bə gir omə...
Bə virosi bod şedəmon,
Debı cürə "xod” şedəmon.
Xəbə beşe "avro” omə,
Votem həlbət abry omə,
Pocimə şe, şəvlo omə,
(Bə polison xavlo omə)*
Qınyəmon bə qıt şedəmon
Debı cürə "xod” şedəmon.
Con olize, səlomət ni,
Şükür, hələ ğıyomət ni,
Avropəko əlomət ni,
Dəy dübədü mod şedəmon
Debı cürə "xod” şedəmon.
Ve kəsi al-imon mardə,
Ve kəs həxi roko qardə,
Şəkərimon bino kardə,
Ov bedəmon, lod bedəmon,
Debı cürə "xod” şedəmon.
Bilbılimon, handənimon,
Bə ivırə mandənimon,
Çüni ki, çəm ğandənimon,
Ha çəmədə pıt şedəmon,
Debı cürə "xod” şedəmon.
Sinəm püre bənə honi,
Ğıbon dodəm ıştə coni,
Jen dı merdi, merd dı jeni,
Şəv-ruji pıt-pıt şedəmon,
Debı cürə "xod” şedəmon.
Jimon şe-şe bətər bedə,
Ve komon dardısər bedə,
Qılə vəyə, xəy-şər bedə,
Bə co kəsi "şot” şedəmon,
Debı cürə "xod” şedəmon.
Merd ağliko bedə rozi,
Küşyədə ümri dorozi,
Şəyton omdə bəmə bozi,
Həx bedəmon, mot şedəmon,
Debı cürə "xod” şedəmon.
Pül bə hiçi rəsedəni,
Yol Xıdoko tarsedəni,
Qüş korıbə, məsedəni,
Kardedəmon dod, şedəmon,
Debı cürə "xod” şedəmon.
Yod beməkən ğıyoməti,
Əzob mədən bə milləti,
Xıdo fərzə ibodəti,
Dodəmon bə fot şedəmon,
Debı cürə "xod” şedəmon???
Присоединяйтесь к ОК, чтобы подписаться на группу и комментировать публикации.
Нет комментариев