Юрагим безовта кўнглим ғаш нечун?

Аламга бағримни ёполмай қолдим,
Бир яхши жой йўқ кетишим учун,
Ўзимдан ўзимни тополмай қолдим.
Эй ранги рангимдан сарғайган қуёш,
Қалбимга бир қара ўт олсин ғамлар,
Мен балки бугунга беролмайман дош,
Балки менсиз ўтар эртанги дамлар.
Юрагим безовта, қайғур ей осмон,
Хор бўлган қадримни алдаб улуғла,
Мен хозир йиғласам чиқиб кетар жон,
Илтимос бугунча ўрнимга йиғла.
Менинг кўз ёшимга Онам ўксиниб,
Йиғласам гўримга ағёр ғишт қалар,
Сен йиғла...
Эй само ғанимлар синиб,
Қувнасин товоним ўпган майсалар.
Мен кузда тўкилмай қишга етсам бас,
Дардимни тўкаман оппоқ қорларга,
Художон қишдан сўнг бахорга етказ,
Бағримни босайин лолазорларга.
Кундан кун оқариб бораяпти соч,
Кундан кун зардобга тўлмоқда юрак,
Айрилиқ, қоч мени йўлларимдан қоч,
Бугун мен кимнидир кўришим керак.
Кўрмасам эртага йўқотишликдан,
Кўнглимни кемирар туйғулар тутқун,
Нахот бу хаммаси интизорликдан?
Кўрмасам мен бугун йиғлашим мумкин.