Йигитларга маслаҳат (кимга ҳазил, кимга чин) Ҳурматли йигитлар, уйланишингиздан аввал

сизларга бир-икки маслаҳат бермоқчиман. Яна
“чолларга ўхшаб насиҳат қилар экан-да”, деб
ўйламанг. Мен замонга мослаб маслаҳат
бераман. Ҳозир ўзингиз билиб оласиз.
Айтайлик, ҳозир “онасига қараб қизини ол” деган мақол модадан қолган. Ундан кўра
“отасига қараб қизини ол” деган мақолни
жорий қилиш керак. Тўғри-да, бўлажак
қайнотангизнинг қандай одамлиги, айниқса
қандай лавозимда ишлаши, қанча пул топиши
жуда муҳим. Қайнотангиз катта мансабни эгаллаган, бадавлат одам бўлса, ошиғингиз
олчи, тўкин ҳаёт кечиришингиз
кафолатланади. “Ие, бу қанақаси бўлди? Ахир эркак деган
ўзини ҳам оиласини ҳам ўзи таъминлаши
керак! Қайнотасининг бойлигига суяниб яшаш
эркакчиликка тўғри келмайди”, дейишингиз
мумкин. Лекин ҳозир эркакчилик ҳам модадан
қолган. Давом этамиз. Бўлажак келин олий ўқув
юртида ўқиса, “бюджет”ми ёки “контракт”ми,
аниқлаб олинг. Зинҳор шартнома асосида
ўқийдиган талабага уйланманг. Акс ҳолда
ўқиш пулини тўлашингизга тўғри келиб
қолиши мумкин. Жуда бўлмаса, бўлажак қайнотангизга тушунтиринг, тўйдан кейин ҳам
ўқиш пулини тўлашни канда қилмасинлар.
“Мен эркакман. Ўқиш пулини ўзим тўлайман”,
деб юборманг. Эркакчиликни бир четга суриб
туринг. Энди тўй харажатлари ҳақида гаплашсак. Сиз
келинга берилажак маҳр учун иложи борича
арзонроқ нарса танланг ёки йўлига “шу ҳовли
сенинг маҳринг” деб қўйинг. Қўрқманг,
мабодо ажрашгудек бўлсангиз маҳрга, берган
ҳовлингизни олиб қолиб, келинни ҳайдаб юборасиз. “Лафз деган нарса қаёқда қолади?”
дейишингиз мумкин. Лафз деган тушунча
аллақачон эскириб қолган. Келин тараф қиладиган харажатлар борасида
эса бошқача йўл тутинг. Яъни келин тараф
жиҳозларнинг иложи борича қимматроғини
олиб келишини айтинг. Сиз бўшатиб қўйган
хоналарга келин тафардагилар мебелнинг энг
қимматини ўрнатиб, пардаларнинг энг зўрини осиб, гиламларнинг энг сарасини ёзиб
кетишсин. Кейин олиб келинган нарсаларни
яхшилаб текширинг. Мабодо бирор нарса
сизга ёқмаса, бехижолат айтинг, яхшироғини
олиб келишсин. “Мен Эроннинг гиламини,
Италиянинг мебелини хоҳловдим. Алмаштириб беринглар”, дейишдан асло
уялманг. Тўғри, сизга кимдир танбеҳ бериши
мумкин: “Ҳой, барака топгур. Келиннинг ота-
онаси сенга оқ ювиб, оқ тараб ўстирган
суюкли қизини – юрагининг бир парчасини
бериб қўйса-ю, сен улардан яна мол талаб қилишга уялмайсанми?” деган одамга сиз “
Нега уялишим керак экан? Қайси замонда
яшаяпсиз ўзи?” деб жавоб беринг. Ҳозирги
замонда сурбетроқ бўлиш фойдали.
Ишонаверинг. Тўйдан кейин ҳам келин тарафдан нарса талаб
қилишда давом этаверинг. Масалан, кир ювиш
машинаси, чангютгич, совутгич ва ҳоказолар.
Келиннинг ота-онаси ночор бўлишса ҳам,
талаб қилаверинг. Қийналиб бўлса ҳам, олиб
беришади. Ахир уларнинг жонажон қизи сизнинг қўлингизда-ку. Қизларининг
тинчлигини ўйлаб айтган нарсангизни олиб
беришлари аниқ. Рўзғор тебратиш масаласига келсак, ўзингизни
кўп уринтирманг, ишлаб нима қиласиз? Хотин
бор-ку. Хотинингиз ишласин, тижорат қилсин,
чет элдан мол олиб келиб сотсин. Ҳеч бўлмаса,
мардикорлик қилсин. Хотиннинг пулини еб
ётишга нима етсин? Уй-рўзғор юмушларида унга мутлақо ёрдам берманг. Хотин – бу қул.
Сизнинг уйингизга қулликка келган, қуллигини
қилсин. Одамлар сизга “Сен ҳам эркакмисан?
Суф сенга” дейишлари мумкин. Майли, эркак
бўлмай қўяқолинг. Майли, сизни эркак деб
аташмасин. Лекин юқоридаги маслаҳатларимга амал қилсангиз, роҳат-
фароғатда яшайсиз. А, лаббай?.. САРКОР