Кетган кетаверсин, эшиклар очиқ,

Омонат деворлар нураб кетади.
Кўнгилда қолмоқлик кўнгилга боғлиқ,
Бизга қолганларнинг ўзи етади.
Кетган кетаверсин, чорамиз қанча,
Кетмоқ истадими, ниятга етсин.
Муқаддас ўринга талабгор анча,
Шартта кўнглимизни бўшатиб кетсин.
Кетган кетаверсин, вақт дегани зиқ,
Беш кун умримизнинг ярми ҳам ўтди.
Вафоси йўқларнинг кетмоғи аниқ,
Ўшалар жуда кўп манзилдан кетди.
Кетган кетаверсин, қол деган номард,
Қиш кетса, ўрнига келади баҳор.
Қанча ишонганлар бермадими панд,
Бизнинг Худодан кўп умидимиз бор.
Кетган кетадида, нима ҳам дердик,
Кетишни ниятлаб келган у бошдан.
Нима ҳам кутасиз кун бўйи ёниб,
Оқшомда индамай ботган қуёшдан.
Кетган кетаверсин, кулдик шарақлаб,
Тунда қоласиз деб хўп урдилар бонг.
Эртага бошқа бир қуёш ярақлаб,
Эртага албатта отар янги тонг.
Кетган кетаверсин, эшиклар очиқ....
Малика Тавфиқ.