БЕГУНОҲ.

Мен сени кечирдим, исминг исинган
Меҳрибон дарахтлар ҳаққи-ҳурмати.
Мен сени кечирдим, ўша тун синган,
Синмаган қадаҳлар ҳаққи-ҳурмати.
Девона орзиқиш,
Қиш каби чойшаб,
Бўлинган,
Уланган,
Унутилган гап…
Мен сени кечирдим, тонггача йиғлаб,
Қизарган нигоҳлар ҳаққи-ҳурмати.
Кўрнамак ҳисларнинг елкаси оғрир,
Улкан тун. Изтироб.
Бўлмади охир…
Мен сени кечирдим, енгил-у оғир
Ҳам ширин гуноҳлар ҳаққи-ҳурмати.
Кечирдим.
Кўзингни кўзим тинглаган.
Гилослар панглаган,
Узум занглаган.
Сен менга айтмаган, ўзим англаган
Иқрор-у изоҳлар ҳаққи-ҳурмати.
Юрагим чўкканда қўллади чолғу,
Оҳимда симиллаб етилди оғу.
Мен сени кечирдим,
“Чўли Ироғ”у,
“Ушшоғ”-у,
“Сегоҳ”лар ҳаққи-ҳурмати….
Мен сени кечирдим, исминг исинган
Бегуноҳ дарахтлар ҳаққи-ҳурмати…
Шаҳриёр Шавкат.