ემიგრანტ დედებს

შორს იყოს წყევლა და ანათემა,
ლოცვაში გულგამოხვეულები
ქართველი დედები ანათებენ -
ტაძრებად ქცეული სხეულებით...
და რადგან ეს მიწა ისევ ბრუნავს,
შიშველი მინდვრები გვავალებენ,
სამშობლოს მწვერვალებს დავუბრუნოთ
დედები - ქართული გალავნები...
მთვარე კვლავ ვერცხლისფერ გროშებს ითვლის,
სამშობლოს ეზრდება იარები,
ქართველი დედები დროშებივით
ქარში და წვიმაში ფრიალებენ...
შორს იყოს წყევლა და ანათემა,
ლოცვაში გულგამოხვეულები
ქართველი დედები ანათებენ -
ტაძრებად ქცეული სხეულებით...
სოსო ნადირაძე