Бир оз шошманг, Вақт жаноблари,

Икки оғиз гапим бор сизга.
Мангумиди изтироблари –
Отамерос кечикиш бизга.
Ҳар ҳикмати бир дунё Эгам
Қадрингизни тенгсиз яратмиш.
Замон, макон жиловини ҳам
Ўзидан сўнг сизга қаратмиш.
Бир чиройли ўйнаб юргандим,
Болаларча, келтирмай ғашни.
Билмай қолдим, қачон ўргандим
Сизга тақлид қилиб яшашни.
Не азобни олдим бўйнимга,
Кунлар бошдан-охир эговли.
Бўй бермайди ўйлар ўйимга,
Ҳар қадамим ҳануз ўлчовли.
Ортингиздан чопганим-чопган,
Эртакмикан сизга тенг келиш.
Пушаймонга ким малҳам топган,
Тушимга ҳам кирмас енгилиш.
Бир кун ногоҳ йўқолиб қолсам,
Ҳайрон бўлманг излаб изларим.
Сизни катта йўлда хотиржам
Кутиб олар ёруғ сўзларим....