Երբ մի եկեղեցում քարոզում են կենդանի Աստծուն, Արքայության Ավետարանն են քարոզում, մեզնից շատերը խրոխտ կեցվածքով նրանց աղանդավոր ենք հայտարարում ու սկսում ենք քարկոծել: Թերթերով, համացանցով, հեռուստատեսությամբ բանսարկություններ ենք կազմակերպում՝ նրանց ազգի թշնամի հռչակելու համար: Կազմակերպություններ ենք հիմնում,հոդվածներ ենք տպում, հաղորդումներ ենք նկարում...

Բայց երբ ազգովի ընկել ենք աներևակայելի մոլուցքի, վտանգավոր պաշտամունքի գիրկը ու այծի հետ ենք կապում մեր բարօրությունը, ձայն հանող չկա:
Ու՞ր եք, տոտալիտար աղանդներից պաշտպանողներ, ու՞ր եք, ռազմահայրենասեր երիտասարդական լիգաներ:Ազգը թողել է Հիսուսին, այծին է պաշտում, այն էլ Սուրբ Ծնունդի սուրբ օրերին: Ինչո՞ւ եք լռում, պարոնայք «նախանձախնդիրներ»:
Խնդրում եմ, մարդիկ, մի տրվեք վտանգավոր այծադավանության աղանդավոր քարոզչությանը: Միայն Աստծուն երկրպագեք: Քրիստոնյա ենք, մնանք քրիստոնյա:
Իսկ եթե այսքանից հետո ձեզ դեռ հետաքրքրում է, թե այծին դուր գալու համար ինչպես է պետք դիմավորել նոր տարին, պատասխանեմ՝ մկկալով: