Շնորհավորում ենք նոր ուսումնական տարվա սկիզբն ավետող Սեպտեմբերի 1-ի՝ Գիտելիքի, դպրության օրվա առթիվ, որով սկսվում է հույսերով լի ուսումնական տարին: Ցանկանում ենք հետաքրքիր, հայտնություններով հարուստ ու հաջողություններով լի տարի: Ուսումնական տարվա սկիզբն ավետող այս օրն առավել հիշարժան է մեր առաջին դասարանցիների համար: Ջերմ բարեմաղթանքներն ենք հղում բոլոր տնօրեններին, մանկավարժներին, դասվարներին, դասախոսներին, ուսանողներին ու աշակերտներին և սիրով ներկայացնում արխիվային այս հոդվածը.

ԴՊՐՈՑԱԿԱՆ ԿՅԱՆՔ
Օրդուբադի շրջանի Փառակա գյուղի դպրոցի մանկավարժական կոլեկտիվը լուրջ հաջողություններ է ձեռք բերել ուսումնական տարվա անցած երեք քառորդներում: Ամրապնդվել է գիտակցական կարգապահությունը, բարելավվել է դասավանդման որակը, բարձրացել է աշակերտների առաջադիմությունը: Առանձնապես բարձր ցուցանիշներ են տվել դպրոցի առաջավոր դասատուները` վաստակավոր ուսուցչուհի Արմիկ Ազիզյանը, Գայանե Ղազարյանը, Առաքել Մարգարյանը: Նրանց դասարաններում վատ սովորող աշակերտներ համարյա չկան: Դպրոցի դիրեկցիան և մանկավարժական կոլեկտիվը այժմ լարված աշխատանք են կատարում չորրորդ քառորդը հաջո-ղությամբ ավարտելու և տարեվերջի փոխադրական քննություններին նախապատրաստվելու համար: Մենք չորրորդ քառորդի սկզբից կազմել ենք կրկնությունների անցկացման հատուկ պլան: Դպրոցի բոլոր ուսուցիչները ծանոթացել են պլանի հետ և ծրագրային նյութին զուգընթաց սկսել են անցած նյութերի կրկնությունները: Աշակերտներին խոր ու կայուն գիտելիքներ տալու նպատակով մի շարք կոնկրետ միջոցներ ենք ձեռնարկել: Այսպես, աշխուժացվել են գրական, պատմա-կան, ռուսաց լեզվի, մաթեմատիկայի և առարկայական մյուս խմբակների աշխատանքը: Այդ խմբակներում բովանդակալից զեկուցումներով հանդես են գալիս աշակերտները: Հատուկ դասասենյակում, որը կահավորված է դիտողական անհրաժեշտ պարագաներով, պարբերաբար կոնսուլտացիաներ են տալիս ուսուցիչները: Անցած նյութերի կրկնությունները լավ է կազմակերպված չորրորդ, յոթերորդ և տասներորդ ավարտական դասարաններում: Ուսուցիչները լրացուցիչ պարապմունքներ են անցկացնում քննության ենթակա առարկաներից: Բոլոր դասարաններում հաշվի են առնվել չառաջադիմող աշակերտները, նրանց համար կազմակերպվել են արտադասարանական պարապմունքներ: Դպրոցի մանկավարժական խորհուրդը քննարկելով տարեվերջի փոխադրական ու ավարտական քննությունների նախապատրաստության հարցը, կոնկրետ հանձնարարություններ է տվել դասատուներին ու առանձին դասարանավարներին, որոնք օգնում են աշակերտներին չորրորդ քառորդում ավելի ռացիոնալ օգտագործելու իրենց ժամանակը: Քննություններին հաջող նախապատրաստվելու գործին մանկավարժական կոլեկտիվին մեծ օժանդակություն են ցույց տալիս ծնողները: Նրանք հաճախակի լինում են դպրոցում, հետևում են, որպեսզի աշակերտները խելացիորեն կազմակերպեն իրենց ժամանցը, բարեխղճորեն կատարեն ուսուցիչների տված տնային հանձնարարությունները: Բոլոր ծնողները ծանոթացել են քննությունների անցկացման նոր կարգի հետ:
Թ. Ղուկասյան Փառակա գյուղի միջնակարգ դպրոցի դիրեկտոր
«ԿՈՄՈՒՆԻՍՏ» պարբերական (խորհրդային շրջանի տեսական-քաղաքական հանդես)
ՇԱԲԱԹ, 15 ԱՊՐԻԼԵ, 1950Թ., № 76 (8164), էջ 3, «ԲԱՐՁՐ ՑՈՒՑԱՆԻՇՆԵՐՈՎ» հոդված
Հ.Գ.
Նախահեղափոխական Փառակայի ծխական քարաշեն գեղեցիկ դպրոցի շենքը 1890թ. կառուցել է բարերար Ղևոնդ փառակեցի Հակոբյանը իր անձնական միջոցներով: Դպրոցը ընդմիջումներով գործել է (1896-1909թթ.) մինչև 1917թ., ուր սովորել են 60-ից 100 աշակերտ: Սկզբում այն եղել է միադաս, ապա՝ եռամյա ու երկսեռ, կոչվել է հարգարժան բարերարի անունով: Պարոն Ղևոնդ Հակոբյանը այնուհետև տեղափոխվել է Թիֆլիս և ամեն տարի դպրոցին աջակցել բավականին մեծ գումարով, հոգացել ծխական դպրոցի մասին, իր հաշվին յուրաքանչյուր ուսուցչին 50 ռուբլի հավելյալ նպաստ վճարել: Սովի տարիներին փառակեցիները հանրագրով դիմել են հիշյալ պարոնին խնդրելով, որ իրենց համար 2 վագոն ցորեն ուղարկի: Հարգարժան բարերարը Թիֆլիսից փոստով պատասխանել է. «Չնայելով, որ շատ գործեր ունեմ, բայց գիտակցելով, որ այդ գործը շատ ավելի կարևոր է, քան իմ անձնական գործերը, պատրաստ եմ 3 վագոն ցորեն բերել գյուղը, որից 2 վագոնը բաժանելու եմ գյուղի աղքատ ընտանիքներին և զինվորների կանանց առքի գնով, իսկ ավելացածը ունևորներին 50 կոպեկ փութին հավելումով, մյուս վագոնը բաժանելու եմ շրջակա գյուղերի աղքատ ընտանիքներին և զինվորների կանանց՝ անխտիր»:
Խորհրդային տարիներին Փառակա գյուղի դպրոցի ուսուցիչներն են եղել.
- Գրիշա Հարությունյանը, Թուման Ղուկասյանը, Վլաս Սահակյանը, Գայանե Ղազարյանը, Առաքել Մարգարյանը, Առաքել Մելքումյանը, Առաքել Մանվելյանը, Աշխեն Նիկողոսյանը, Արմիկ Ազիզյանը, Քնարիկ Հովհաննիսյանը, Հովհաննես Նիկողոսյանը, Վարդուհի Գալստյանը, Արամ Շմավոնյանը, Եղիսաբեթ Սահակյանը, Եվգենյա Սարգսյանը, Էմմա Ղուկասյանը, Վարդան Ջանգոզյանը, Սարգիս Ոսկանյանը, Եղիսաբեթ Ռոստոմյանը, Վարսեն Հարությունյանը, Լեմիկ Հայրապետյանը, Էմմա Գալստյանը, Հարություն Գևորգյանը, Հեղինե Ղուկասյանը, Ռենատա Ղուկասյանը, Լաուրա Ղուկասյանը, Աշոտ Հակոբյանը (Էջմիածնեցի), Էլմիրա Մանվելյանը, Արմենակ Համբարձումյանը, Վոլոդյա Նիկողոսյանը, Էլիզա Նիկողոսյանը, Սամվել Մարգարյանը, Լիդա Մարգարյանը, Ժորա Սարգսյանը:
Փառակա գյուղի դպրոցի դիրեկտորներն են եղել.
- Միսակ Գալստյանը, Արմենակ Սահակյանը, Թուման Ղուկասյանը, Գայանե Մանվելյանը, Առաքել Մարգարյանը, Լեմիկ Հայրապետյանը:
Նկարում - Նախիջևան քաղաքի Մանկավարժական տեխնիկումի 2-րդ կուրսի փառակեցի ուսանողուհիներ Էմմա Ղուկասի Ղուկասյանն է և տատիկս (աջից նստածը)՝ Եվգենյա Համբարձումի Սարգսյանը, 1938թ.:
Բարերար Ղևոնդ Հակոբյանը մանկավարժ տատիկիս հոր՝ Համբարձում Աղաբեկի Տեր-Սարգսյանի քեռին է եղել, ցավոք, նկարը պահպանված չէ:
Հարգանքով՝ Խաչիկ փառակեցի Շմավոնյան