Павел Дураў гатовы выкупіць скрадзеныя з Луўра каштоўнасці

Нагадаем, парыжскі Луўр абрабавалі 19 кастрычніка. Усяго скралі восем прадметаў, сярод якіх:
• дзве брошкі, гарсажны бант і дыядэма імператрыцы Яўгеніі, жонкі Напалеона III;
• ізумруднае калье і завушніца з калекцыі Марыі-Луізы, жонкі Напалеона I;
• калье, завушніцы і дыядэма Марыі Амаліі, жонцы караля Луі-Філіпа I, і Гартэнзіі Багарнэ, маці Напалеона III.
Усе гэтыя прадметы ўпрыгожаны тысячамі брыльянтаў і іншых каштоўных камянёў.
Заснавальнік Telegram Павел Дураў заявіў ў сацсетцы Х, што яго зусім не здзівіла рабаванне парыжскага музея. Па яго словах, французскі ўрад «давёў да дасканаласці мастацтва адцягваць людзей уяўнымі пагрозамі замест таго, каб супрацьстаяць рэальным».
Пасля ў адказе на жарт у каментарах ён дадаў, што гатовы выкупіць скрадзеныя з парыжскага Луўра ювелірныя ўпрыгожанні і перадаць іх у Луўр, які месціцца ў Абу-Дабі, бо з яго «ніхто не крадзе».
Цяпер над справай аб рабаванні працуюць 60 французскіх следчых. Ёсць засцярогі, што, калі злачынцаў не зловяць у бліжэйшыя дні, скрадзеныя прадметы разбяруць па каменьчыках і вывезуць з краіны.
Гэта самае дзёрзкае рабаванне Луўра з 1911 года, калі скралі карціну Леанарда да Вінчы «Мона Ліза». Твор знайшлі праз 3 гады і з тых часоў ён стаў настолькі вядомым, што робіць музей самым папулярным у свеце.
Крыніца: https://x.com/durov/status/1980379854148395201?s=46 Фота: з адкрытых крыніц