Савет міністраў апублікаваў пастанову, згодна з якой адзіны інфраструктурны аператар - кампанія «Беларускія воблачныя тэхналогіі» абавязана забяспечыць роўны доступ усіх аператараў электрасувязі да адзінай сеткі 4G/5G.

Пастанова таксама прадпісвае патрабаванні да ахопу тэрыторыі Беларусі паслугамі сотавай сувязі і іх якасці.
Сярэдняя хуткасць перадачы даных у мабільных сетках да канца 2030 года павінна быць не менш за:
• 135 мегабіт у секунду ў Мінску і абласных цэнтрах (цяпер 35);
• 110 мегабіт у секунду ў раённых цэнтрах, гарадах і пасёлках гарадскога тыпу (цяпер 15);
• 30 мегабіт у секунду на астатняй тэрыторыі (цяпер 7).
Да слова, па звестках глабальнага рэйтынгу Ookla, Беларусь месціцца у самым канцы ў спісе са 103 краін па хуткасці інтэрнэту. У жніўні наша краіна паднялася на адзін бал і апынулася на 102 радку. Ніжэй толькі Балівія.
Сярэдняя хуткасць спампоўкі ў Беларусі ў мабільных сетках складае 18,55 мегабіта ў секунду, а запампоўкі – 8,12 мегабіта ў секунду.
З краін-суседзяў, найхутчэйшы інтэрнэт у Латвіі – 127,07 мегабіта і 29 месца ў рэйтынгу. А самы павольны ў Расіі – 37,42 мегабіта ў секунду і 90 месца.
Крыніца: https://pravo.by/document/?guid=12551&p0=C22500540