Хлопчык у Мазыры гуляўся з запальнічкай і падпаліў ложак.

Але з пажарам дала рады старэйшая сястра
У сям’і Шыловічаў з Мазыра пяцёра дзяцей. Старэйшая, Хрысціна, уратавала ўсіх сваіх малодшых братоў і сясцёр ад магчымай трагедыі. За гэта яе асобна адзначылі і ўзнагародзілі ў мясцовым упраўленні МНС.
3 верасня малодшы з братоў дабраўся да запальнічкі і пачаў гуляцца з ёю. У выніку пачаў гарэць ложак. На шчасце, на ўзгарэнне хутка і спраўна адрэагавала Хрысціна. Школьніца не разгубілася і вывела малодшых дзяцей на балкон, каб яны не дыхалі дымам. А потым дзяўчына пачала тушыць агонь. Спачатку падушкай, потым прынесла тазік з вадой.
Справіцца з агнём ёй удалося самой. Пасля суседзі вывелі ўсіх дзяцей з кватэры на вуліцу і выклікалі пажарных. Калі ратавальнікі прыехалі на месца, пажар быў ліквідаваны, але быў задымлены пад’езд. Дзякуючы рэакцыі Хрысціны, ніхто не пацярпеў.
Пазней дзяўчыну ўзнагародзілі і падарылі ўсім дзеткам падарункі ад МНС. Таксама для мазыранкі і яе сям’і правялі экскурсію па пажарнай частцы.
Фота: скрыншот «Телеканал Мозырь»
Крыніца: https://t.me/tkm_news/15371