Беларус пайшоў купацца ў дзень вяселля і згубіў заручальны пярсцёнак.

Праз тыдзень згубу знайшлі вадалазы
Нават калі не верыць у дурныя прыкметы, усё адно страціць заручальны пярсцёнак – вельмі непрыемна.
Такая гісторыя здарылася з Ксеніяй і Вадзімам у Гродзенскай вобласці, у аграсядзібе на беразе Нёмана. Малады паспеў панасіць свой пярсцёнак лічаныя гадзіны – той згубіўся, калі ён пайшоў пакупацца ў рацэ. Згубу ён заўважыў ужо раніцай на наступны дзень.
Вядома, пярсцёнак пайшлі шукаць, але так і не знайшлі – засмуціліся і паехалі дадому.
Пасля вяселля Вадзім з’ехаў у рэйс, а яго жонка вырашыла яшчэ раз паспрабаваць знайсці ўпрыгожанне. Яна звярнулася па дапамогу ў выратавальную станцыю Ліды. Там адразу папярэдзілі, што знайсці такую маленькую рэч будзе складана, але пагадзіліся дапамагчы.
І хаця ў поспех амаль ніхто не верыў, сабралася каманда вадалазаў і група падтрымкі. Пошукі цягнуліся больш за гадзіну, і калі Ксенія ўжо адчаілася, раптам адзін з вадалазаў вынырнуў з пярсцёнкам у руках. Упрыгожванне праляжала на дні ракі цэлы тыдзень і яго не знесла плынню.
Можна не верыць у прыкметы, але выглядае на тое, што гэты шлюб удалося ўратаваць❤️
Крыніца: https://www.instagram.com/p/DOJBwdMiDgn/?igsh=MXYxdDF3ajAzd3U5NQ==