Бөгелмә егете ачык космоска чыкты

Космонавт Сергей Рыжиков Халыкара космик станциянең гамәлдәге командиры
Сергей Рыжиков һәм тагын бер космонавт Алексей Зубрицкийның ачык космоска чыгуын туры эфирда «Роскосмос» дәүләт корпорациясе трансляцияләде. Бу 2025 елда ачык космоска беренче чыгу.
Космонавтлар «Экран-М» фәнни эксперименты өчен аппаратура урнаштырганнар. Эксперимент өчен махсуслаштырылган комплекс «Фән» модулендә урнашкан. Ул югары чисталыклы ярымүткәргеч материаллар булдыру өчен кирәк. Җайланма үтә төгәл кристаллик структуралар табу өчен космик вакуум һәм авырлыксызлык өстенлекләрен куллана.
Аппаратура урнаштырудан тыш, Рыжиков һәм Зубрицкий иллюминаторны чистартканнар һәм материал үрнәкләре белән төшереп алына торган кассета-контейнерны сүткәннәр.
Космонавтлар Халыкара космик станциянең тышкы өслегендә 6 сәгать 11 минут эшләгәннәр. Сергей Рыжиков өчен бу чыгу аның карьерасында икенче тапкыр. Үзенең беренче корабтан тыш эшчәнлеген ул 2020 елның 18–19 ноябрендә «Союз МС-17» корабында очу вакытында башкарды.
МКС бортыннан икенче чыгу ике атнадан соң планлаштырылган, дип хәбәр итә «Роскосмос».
Фото: трансляциянең скриншоты