Бөгелмәдә Ямашев урамындагы фатирда янгын чыккан

Һәлак булучылар һәм зыян күрүчеләр юк.
10 июльдә, 14 сәгать 24 минутта, 64нче янгын сүндерү часте элемтә бүлегенә Ямашев урамы, 8нче йортта урнашкан фатирда янгын чыгуы турында ашыгыч хәбәр килә.
Һәлакәт урынына килгән янгын сүндерүчеләр икенче подъездның өченче катындагы тәрәзәдән чыккан төтенне күргәннәр. Подъезд эчендә шулай ук көчле төтен була.
Янгынга каршы хезмәт бүлекчәләрен фатир хуҗасы каршы ала, ул бина эчендә беркем дә юк, дип хәбәр итә.
Һәлакәт корбаннарсыз һәм зыян күрүчеләрсез узды. Бөгелмә районы буенча ОНД һәм ПР өлкән инспекторы Вероника Әхмәдуллина версиясе буенча, янгын чыгуның сәбәбе электр җиһазларын урнаштыру кагыйдәләрен бозу булган.
ФОТО: 64нче янгын сүндерү бүлеге архивыннан.