Жнівень – мяжа паміж квяцістым летам і залацістай восенню.

Ужо з першых яго дзён і, асабліва, начэй, адчуваецца лёгкі подых гэтай дажджлівай пары году, якая хутка ўступіць у свае правы.
У паветры ўжо пахне дымам і восеньскім разнатраўем, і гэта чамусьці так настальгічна і ў той жа час сумна ўспрымаецца. Часцей выпадаюць туманы, а ранішняя прахалода становіцца больш адчувальнай. Тонкія серабрыстыя валаконцы павуціння асядаюць на зямлю, чапляюцца за хмызы і платы, упрыгожваюцца кропелькамі вясёлкавай пад промнямі сонейка расы. Адцвітаюць у агародчыках духмяныя ружы, першыя залацістыя лісточкі з’яўляюцца на беластвольных прыгажуньках-бярозках, быццам мноства гранатавых каменьчыкаў паміж яшчэ смарагдавай зеляніны вісяць чырвоныя гронкі рабін, у лясах пачынаюць ружавець брусніцы і журавіны, у садах спеюць сакавітыя яблыкі ды грушы.
Але жнівень яшчэ збіраецца парадаваць нас цёплымі дзянёчкамі ды пяшчотным сонейкам. Таму на выпадак, калі вы ўжо сумна ўздыхаеце і адлічваеце дні да наступнага чэрвеня, мы падрыхтавалі для вас фотападборку апошніх фарбаў гэтага лета, дзякуючы якой вы не толькі крышачку падоўжыце яго, але і захаваеце аб ім памяць да наступнага года.