📝Каçару комиссийĕ ÿсĕрле руль умне ларса машинăсăр тăрса юлнă хĕрарăм ыйтнине тÿрре кăларĕ.
ПР Патшалăх Пухăвĕн-Курултайĕн председателĕ Константин Толкачев ПР Патшалăх Пуçлăхĕн Каçару ыйтăвĕсемпе ĕçлекен комиссийĕн ларăвне ирттернĕ. Айăпланнисем тăратнă икĕ çыруран пĕрне пăхса тухнă. Çтерлĕ хулинче пурăнакан хĕрарăма ÿсĕр пуçпа руль умне ларнăшăн полици ĕçченĕсем тытса чарнă пулнă. Полици аллине иккĕмĕш хут çакланнине шута илсе хĕрарăма çирĕпрех айăплав панă: ĕçпе тÿрлетесси, икĕ çула водитель правине тата автомобильне патшалăха туртса илесси. Хĕрарăм çăмăл машинăсăр тăрса юлнă, судпа палăртнă 240 сехетне ĕçлесе татнă, анчах та хальлĕхе водитель правине илеймест-ха.
🚘- Çак синкерлĕ çул çÿрев ăна, паллах, кирлĕ пулман. Комисси ыйтăва ун майлă татса пама шутларĕ. Хĕрарăм хаклă пурнăç урокĕ илнĕ. Тем тесен те вăл тепĕр хут руль умне ÿсĕрле лармĕ, - тенĕ Константин Толкачев.
✉Иккĕмĕш заявленине йышăнман. Кунта çул-йĕр полицин ĕçченĕ наркобизнеса аталантарас енĕпе чăн-чăн схема хатĕрленĕ. Хăйпе пĕр шухăшлă çынсемпе калаçса татăлса сайт уçнă, сутма валли тесе наркотиксем туянассине йĕркеленĕ. Анчах та ĕç сиенлĕ хутăша салатасси патне çитмен. Интернет урлă пысăк виçепе наркотиксем сутма хăтланнăшăн суд ăна тăхăр çула ирĕксĕр хăварма йышăннă.
- Саккун тăрăх наркопреступленишĕн çирĕп явап тыттараççĕ. Ку тĕслĕхре преступленилле ĕçе обществăри йĕркешĕн яваплă çын, йĕрке хуралçи хутшăннă. Комисси унăн çырăвне пăрахăçланă, - тенĕ ПР Патшалăх Пухăвĕн- Курултайĕн председателĕ.
Комисси пĕтĕмлетĕвне Пушкăртстан Республикин пуçлăхĕ пăхса тухĕ. Ун хыççăн материалсене Раççей Президенчĕ патне ярса парĕç. Юлашки йышăнăва çĕршыв президенчĕ тăвĕ.
Присоединяйтесь — мы покажем вам много интересного
Присоединяйтесь к ОК, чтобы подписаться на группу и комментировать публикации.
Нет комментариев