Финалгача оз қолди.

31 кун ва ўтказилган 63та учрашувдан сўнг, ниҳоят финал остонасида турибмиз. Бугун жамоавий ва индивидуал тактикага асосланган тактикалар тўқнашувининг гувоҳи бўламиз. Лионель Месси “коронацияси” ёки немис машинасининг тарихдаги тўртинчи кубоги? Германия финалга жуда катта ишонч билан этиб келди. Ярим финалда майдон эгаларини 7-1 ҳисобда йирик мағлубиятга учратиб, уларнинг кўпчиликнинг умидини кўмиб қўйганини эслатишнинг ўзи кифоя бўлса керак. Ўйинчилар ҳам юзида табассум ва ўзига бўлган ишончни қайта-қайта намойиш этмоқда. Бундестим 24 йилдан буён мундиалда ғалаба қозона олмаётган ва шу вақт ичида финалда икки марта ўйнаб, иккисини ҳам бой берган терма жамоа ҳисобланади. Афтидан, улар кубокни олишга жуда яқин туришибди. Аргентина эса, рақибларига қараганда кубокни узоқроқ кутмоқда. Сўнгги марта улар 1986 йил Мексикада ўтган Жаҳон чемпионатида ғарбий Германияни 2-1 ҳисобида доғда қолдириб, кубокни қўлга киртган эди. Орадан 4 йил ўтгач, Италия-90 финалида эса, Ғарбий Германия 1-0 ҳисобида Аргентинани ютиб жаҳон чемпионига айланган. Икки терма жамоа ҳам гоҳида ишончли, гоҳида эса ишончсиз ўйин намойиш этиб келди. Лекин, ўйиндан-ўйинга иккиси ҳам хатоларининг устида ишлаб, мана финалгача этиб келди. Мундиалдал олдин кўпчилик Аргентина ўзининг даҳшатли ҳужум чизиғига ( Месси, Агуэро, Игуаин, Ди Мария) эгалигини бонг уриб гапираётган эди. Ваҳоланки, уларнинг 64-ўйингача этиб келишига, ҳужум эмас, балки ҳимоя чизиғи кутилгандан ҳам ишончли ўйин кўрсатди ва айнан ҳимоянинг шарафига улар бугун финал остонасида туришибди. Тўғри, фақатгина Мессининг биргина ҳаракати деярли ҳар бир ўйинда жамоасига қимматли 3 очкони олиб келди. Нимчорак финалда ҳам худди шундай воқеа юз берди. Швейцарияга қарши кескин ва муросасиз ўйиннинг 118-дақиқасида Месси бутун учрашувдаги деярли биринчи имкониятидан тўлиқ фойдаланиб, Ди Марияни голли вазиятга олиб чиққан эди. Бельгия ва Голландия терма жамоаларига қарши ўйинда ҳам Аргентина термаси биз кутган ҳужумкор эмас, аксинча ҳимоявий ўйинни кўрсатди ва имкон бўлиши билан олдинга ўтишга ҳаракат қилди. Ди Мариянинг финал ўйинига таёрлиги Сабеляни қувонтирса, Агуэрони асосий таркибга қўшиш масаласи усиз ўйнаб келаётган жамоанинг барқарор ўйинига таъсир этиши мумкин. Йоахим Лёв таркибида Месси бор терма жамоага қарши Бразилия билан ўйингидек тактика танламаслиги аён. Хедиранинг олдинга ўтиш қобилиятларини инобатга олган ҳолда, немислар ярим ҳимоясини фақатгина Мессини ёпиш билан овора бўлишини тасаввур қилиш қийин. Бастиан Швайнштайгер учун эса, бугунги ўйин ўзгача синовга эга бўлади. Мессига қарши ўйинда, сўзсиз Бастианга қолган 3 нафар ярим ҳимоячиларнинг ёрдами керак бўлади. Назаримда, Германия термасининг энг нозик нуқтаси бу уларнинг чап қанот ҳимояси. Ушбу қанотда Бендикт Хёведес ҳаракат қилади. Сабеля ҳам сўзсиз, Ди Марияни айни ўша қанотдан ҳужумларни бошлашини уқтириб келаётган бўлса ажаб эмас. Аргентина ҳимояси бугун немис "булдозер"ига дуч келади. Ушбу бульдозер эса, олдинги ўйнаганларидан кескин фарқ қилади. Улар бунга бардош бера оладими? Лёвнинг тактикаси бугун ҳам ўзини оқлайдими? Ваниҳоят, немисларнинг кўйлакларига финалдан кейин тўртинчи юлдузча тикиладими? Буни яқин соатларда билиб оламиз. Бугунга ўйинга менинг тахминий таркибим ва тактик чизиғим: Германий: (тактика, 4-3-3): Нойер; Лам, Хуммелс, Боатенг, Хёведес; Хедира, Швайнштайгер, Кроос; Ўзил, Мюллер, Гютце. Аргентина: (тактика, 4-2-3-1): Ромеро; Сабалета, Фернандес, Гарай, Рохжо; Перес, Маскерано; Палаcио, Месси, Лавеззи; Игуаин.