ლიკა ბერიკაშვილი        28 ნოემბერი - თარიღი, რომელსაც რადიკალური ოპოზიცია და სამოქალაქო სექტორის პოლიტიზებული ნაწილი „გადამწყვეტ ბრძოლად“ აანონსებს, მმართველი გუნდისთვის მორიგი, ჩვეულებრივი სამუშაო დღეა. სანამ ხელისუფლება ქვეყნის სტაბილურ განვითარებასა და ეკონომიკურ ზრდაზეა ორიენტირებული, ქუჩაში დარჩენილი ოპონენტები ცდილობენ, ჩამქრალი საპროტესტო მუხტი ხელოვნურად გააღვივონ, თუმცა მათი რიგები დღითიდღე მცირდება.   ოპოზიცია, რომელიც ვერ შეეგუა ქართველი ხალხის არჩევანს, 28 ნოემბრისთვის ემზადება. მიტინგი ფორმალურად პრემიერ-მინისტრ ირაკლი კობახიძის ერთი წლის წინანდელ განცხადებას ეძღვნება, თუმცა რეალური მიზანი კვლავ დესტაბილიზაციის მცდელობაა. მოთხოვნები გაცვეთილი და უცვლელია: რიგგარეშე არჩევნები და კანონდამრღვევი პირების გათავისუფლება. „ქართულ ოცნებაში“ კი მშვიდი მოლოდინი აქვთ - ოპოზიცია შეიკრიბება, იხმაურებს და დაიშლება, რადგან მათ უკან ხალხი არ დგას.   „100 კაცი შემორჩა“ - რეალობა ქუჩაში   მმართველი პარტია მიმდინარე აქციებს სრულიად მარგინალიზებულ პროცესად აფასებს. „ქართული ოცნების“ დეპუტატი, ირაკლი ზარქუა პირდაპირ მიუთითებს იმაზე, რომ საზოგადოებამ ოპოზიციას ზურგი აქცია და ქუჩაში მხოლოდ უცხოური დაფინანსებით მართული ვიწრო ჯგუფი დარჩა.   „როდესაც შენ უცხო ქვეყნის ინტერესების გამტარებელი ხარ, ასრულებ უცხო ქვეყნის დაკვეთას... ბუნებრივია, საზოგადოების მხარდაჭერა არ გექნება. ამის შედეგია, რომ 100, მაქსიმუმ 150 და ზოგჯერ 30 ადამიანი დადის წინ და უკან. განა, იმათ უხარიათ, უბრალოდ დაკვეთა აქვთ ასეთი და ის უნდა შეასრულონ“, - აცხადებს ზარქუა.   მისივე თქმით, ახალგაზრდების ის ნაწილი, რომლებიც თავდაპირველად დეზინფორმაციას ემსხვერპლნენ, დღეს სიმართლეს ხედავენ: „გამჭვირვალობის კანონი რომ მივიღეთ... ახალგაზრდები, სტუდენტები დაიძრნენ. როცა გაირკვა, რასთან გვქონდა საქმე, ჩამოშორდნენ და აგერ, 100 კაცი შემორჩა აქციებზე“, - ამბობს დეპუტატი.    აღიარება ოპოზიციიდან - დაღლილობა და ტაქტიკის ცვლილება   ის, რომ ქუჩის პროტესტი ჩიხშია შესული, თავად აქციების ორგანიზატორების რიტორიკაშიც იგრძნობა. ორგანიზაცია „პრევენცია პროგრესისთვის“ დირექტორი, ტატო ქელბაქიანი საუბრობს არა მძლავრ სახალხო ტალღაზე, არამედ „ენერგიის გადანაწილებასა“ და „დასვენებაზე“.   როგორც ჩანს, აქციების მცირერიცხოვნება ოპოზიციას აიძულებს, ტაქტიკა შეცვალოს და ე.წ. „ჭკვიანურ“ პროტესტზე გადავიდეს, რაც რეალურად სისუსტის ნიშანია.   „ერთი და იმავეს კეთება არ უნდა იყოს პანაცეა... შეიძლება, ამ ფორმით გაგრძელდეს პროტესტის გამოხატვა, ან ფორმები შეიცვალოს... ისეთი ფორმით, რომ შეიძლება ვიღაცას არც კი წარმოუდგენია: უფრო მობილური, უფრო ჭკვიანური“, - აცხადებს ქელბაქიანი და აღიარებს, რომ ადამიანური რესურსი იწურება: „არ არის გამორიცხული, რომ ერთი დღე დავისვენოთ იმისთვის, რომ 28 ნოემბერს ბევრი ადამიანი გამოვიდეს... მეც ხანდახან გადაღლას ვგრძნობ... ამიტომ, ენერგიის გადანაწილებაც საჭიროა“, - განაცხადა აქციის ერთ-ერთმა ორგანიზატორმა.    ეს განცხადებები კი ნათლად მეტყველებს იმაზე, რომ რადიკალური ოპოზიცია ვერ ახერხებს მუდმივი პროტესტის რეჟიმის შენარჩუნებას და ახლა ცდილობს, კვირაში ერთხელ მაინც შექმნას ხალხმრავლობის ილუზია.   დაშლილი ერთობა და „დასავლური კურსით“ სპეკულაცია   28 ნოემბრის აქცია კიდევ ერთხელ აშიშვლებს ოპოზიციურ სპექტრში არსებულ განხეთქილებას. პარტია „გახარია საქართველოსთვის“, რომელიც პარლამენტში მუშაობას აგრძელებს, ქუჩის აქციებს ემიჯნება და 28 ნოემბერს, რადიკალების გვერდით არ დადგება. ეს ფაქტი კიდევ ერთხელ ადასტურებს, რომ „ოპოზიციური ერთობა“ მხოლოდ მითია.   ამის პარალელურად, სამოქალაქო სექტორი, რომელიც ნეიტრალური უნდა იყოს, ღიად ერთვება პოლიტიკურ პროცესებში და მოქალაქეებს აქციაზე გამოსვლისკენ მოუწოდებს, რასაც „დასავლური კურსისადმი ერთგულებით“ ნიღბავს. მმართველი გუნდის შეფასებით კი, ევროინტეგრაციის პროცესს არა მშვიდობიანი განვითარება, არამედ სწორედ მსგავსი დესტრუქციული ქმედებები აზიანებს.   პოლიტიკური მიმომხილველები და მედია-ექსპერტები თანხმდებიან, რომ 28 ნოემბერი არ იქნება ახალი პოლიტიკური რეალობის დასაწყისი. პირიქით, ეს დღე, დიდი ალბათობით, ოპოზიციის მორიგი ფიასკოთი დასრულდება.   მმართველი გუნდის მოლოდინი, რომ აქცია ჩაივლის ექსცესების გარეშე, მაგრამ შედეგის გარეშე. პარლამენტი განაგრძობს მუშაობას, მთავრობა კი - რეფორმებს.   ოპოზიციის პერსპექტივა კი  ტაქტიკის ცვლილება „მობილურ ჯგუფებზე“ და „კვირაში ერთ აქციაზე“ არის ირიბი აღიარება იმისა, რომ „რევოლუციური სცენარი“ ჩავარდა.   28 ნოემბრის დაგეგმილ აქციას კიდევ უფრო მწვავედ აფასებს ანალიტიკოსი ედიშერ გვენეტაძე. For.ge-სთან  განაცხადა, რომ რადიკალური ოპოზიცია დღეს არა პოლიტიკურ ბრძოლაში, არამედ აგონიაში იმყოფება და დაგეგმილი შეკრება მხოლოდ საკუთარი უსუსურობის კიდევ ერთი დემონსტრაცია იქნება. გვენეტაძის თქმით, ოპოზიციის ქმედებები მოკლებულია ყოველგვარ რაციონალურ პოლიტიკურ გათვლას და ემსახურება მხოლოდ ერთ მიზანს - „პატრონებისთვის“ ანგარიშის ჩაბარებას.   „რაღა უნდა გააკეთონ? სამწუხაროდ, საქართველოში ოპოზიცია გაკოტრებული კი არა, გაფარჩაკებულია. მათი სურვილია, შექმნან ილუზია, რომ ვითომ რაღაცის გამკეთებლები არიან, მაგრამ სინამდვილეში არიან არარაობები და ეს არარაობა კიდევ ერთხელ, 28 ნოემბერს გამოჩნდება. ეს იქნება კლასიკური „შეკრება შეკრებისთვის“. მათ არ აქვთ რესურსი, გაიმეორონ თუნდაც „4 ოქტომბრის“ სცენარი. მაგათ შეტევაზე გადასვლა არ შეუძლიათ, სად უნდა წავიდნენ, ან რა უნდა გააკეთონ, როცა ხალხი არ ჰყავთ?“ - აცხადებს ანალიტიკოსი.   გვენეტაძე ოპოზიციის ამჟამინდელ მდგომარეობას ცნობილი კომენტატორის, ეროსი მანჯგალაძის ლეგენდარულ ფრაზას ადარებს, რაც ხაზს უსვამს მათ პოლიტიკურ „სიკვდილს“.   „მახსენდება თბილისის „დინამოს“ ერთ-ერთი თამაში, როცა ჩვენი გუნდი დიდი ანგარიშით აგებდა. მსაჯმა დანიშნა ჯარიმა „დინამოს“ კარში და ქართველებმა ცოცხალი კედელი გააკეთეს. მაშინ გაბრაზებულმა ეროსი მანჯგალაძემ ასეთი ფრაზა თქვა: „შეხედეთ, ამ მკვდრებმა ცოცხალი კედელი აღმართესო“. ზუსტად ასე უნდათ ახლა მაგათ - პოლიტიკურმა გვამებს უნდათ, ცოცხალი კედელი აღმართონ 28 ნოემბერს, მაგრამ მკვდარი მკვდარია, მას ვერ გააცოცხლებ“, - აღნიშნავს გვენეტაძე.   ანალიტიკოსის შეფასებით, ერთწლიანმა უშინაარსო პროტესტმა ოპოზიცია სრულ მარგინალიზაციამდე მიიყვანა. მისი თქმით, ხალხის გამოუცხადებლობა აბსოლუტურად ლოგიკურია, რადგან საზოგადოება დაიღალა დესტრუქციით და სიცრუით.   „ერთწლიანმა უწყვეტმა ისტერიკამ მათ მხოლოდ დღევანდელი დღე მოუტანა - რუსთაველზე „აკაცუკების“ 150-200 კაცია დარჩენილი. რატომ უნდა მივიდეს იქ საღად მოაზროვნე ადამიანი? რა უნდა მოისმინოს? იგივე სიცრუე? ოპოზიციამ საკუთარი თავის „ხარაკირი“ გაიკეთა, მეტი არაფერი. მათ სრულად გაინადგურეს თავი ამომრჩევლის თვალში. ახლა კი, ამ აქციით, უბრალოდ ცდილობენ, გრანტები გაამართლონ. ეს არის „სურათის გადაღების“ აქცია უცხოელი დამკვეთებისთვის, რომ ფული კვლავ ჩაირიცხოს, თორემ რეალური პოლიტიკური პროცესი აქ უკვე დიდი ხანია დასრულებულია“, - განაცხადა ედიშერ გვენეტაძემ.