Гістарычная плошча.

Частка ІІ.
Дзякуючы паштоўкам, якія друкаваў рагачоўска-бабруйскі гандляр Якаб Вальфсон у супрацоўніцтве з рагачоўскім фотамастакам Малкіным, мы маем унікальныя фотаздымкі кварталаў, што месціліся побач з Саборнай плошчай.
Інфармацыя аб дакладнай лакалізацыі тэрыторыі, выяўленай на першым панарамным фотаздымку, публікуецца ўпершыню. Першы фотаздымак быў зроблены з другога паверха будынка Прысутных месцаў (месціўся на вуглу Бабруйскай і Быхаўскай/ У. Леніна).
Фотаздымак 1 "г. Рогачевъ. Общій видъ"
На левам баку вуліцы Быхаўскай/У. Леніна:
- На першым плане бачна паўночная палова Саборнай плошчы і вельмі дліныя гандлёвыя рады, што месціліся на самой тэрыторыі Саборная плошчы, на яе паўночным краі (пабудаваны пасля пажару 1881 г.). За паўночным краям Саборнай плошчы, адразу за гандлёвымі радамі, ішла вуліца Паштовая/Кап. Пакацілы.
- У сярэднім плане, за гандлёвымі радамі, спачатку бачны дах дома Якаба Вальфсона, потым Берла Беленькага (дом захаваўся)
Фотаздымак 1 "г. Рогачевъ. Общій видъ"
На правым баку вуліцы Быхаўскай/У. Леніна:
- На першым плане бачны паўночна - заходні вугал квартала Сабора А. Неўскага (на яго тэрыторыі быў сад) і працяг вуліцы Паштовая/Кап. Пакацілы (зараз не існуе, гэты працяг вуліцы заняты карпусамі раг. каледжа)
- У сярэднім плане бачны гандлёвы квартал з драўлянымі лаўкамі купцоў. На вуглу гэтага квартала, каля 1905 г., адкрылася аптэка Радовіча. Зараз тэрыторыю квартала амаль цалкам займае аўтавакзал.
- На заднім плане бачны другі гандлёвы квартал, які візуальна зліваецца ў адзінае з першым. У цэнтры гэтага кварталу месцілася царква Раства Багародзіцы (храм, пабудаваны пасля падзелаў Рэчы Паспалітай, задоўга да Сабора Неўскага). Перад царквой Раства Багародзіцы стаіць вялікі цагляны дом невядомага гаспадара. Зараз тэрыторыя квартала цалкам занята рынкам "Маскоўскі".
На другім фотаздымку вы бачыце гэтыя ж квартал, але з зямлі.
Другі фотаздымак зроблены раней чым першы, на што ўказвае яшчэ не зменены выгляд друга паверху дома Якаба Вальфсона.