Николай Никифорович Петров, Петровтар бэтэринээр династиятын туһунан

Биһиги аҕабыт Петров Николай Никифорович 1932 сыллаахха кулун тутар 14 күнүгэр, Пелагея Ивановна уонна Никифор Николаевич Петровтарга, бастакы уол оҕонон Маалтааныга күн сирин көрбүтэ.
Петровтар төрүттэригэр айылҕаттан талааннаах эмчиттэр, отоһуттар төрөөн-үөскээн ааспыттар. Ол курдук эһээбит Ньикииппэр дьон тостубут уҥуохтарын тутан, чартаан биэрэр, хаанныыр, түөннүүр ураты дьоҕурдаах этэ.
Төрүттэрин айылҕаттан биэрбит дьоҕура сыстан, аҕабыт бэтэринээр идэтин талан, 1949 сыллаахха Покровскайга райзооветучастокка бэтэринээр курсун туйгуннук үөрэнэн бүтэрбит. 17 саастаах эдэркээн уолчаан анал үөрэхтэнэн, төрөөбүт дойдутугар Маалтааныга холкуоска идэтинэн үлэлээн саҕалаабыт. Хайдах, туох идэни баһылаан кэлбитин бэрэбиэркэлээри, оччотооҕу холкуос бэрэссэдээтэлэ киһи, түөрт атыыры үүрдэрэн аҕалан аттаппыт. Аҕабыт сорудаҕын этэҥҥэ толорбут, онтон ыла эдэр специалист, дьоҥҥо-сэргэҕэ аптарытыаттанан барбыт, дьон “Бэтэринээр Куола” диэнтэн атыннык ааттаабат буолбуттар.
Киһи барыта хантан эрэ хааннаах, кимтэн эрэ кииннээх. Ол сиэринэн, мин бэтэринээр идэтин таларбар, аҕам Петров Николай Никифорович-Бэтэринээр Куола, Нөмүгү бастакы бэтэринээрэ олук уурбута. Кыра сылдьан, оҕолор аҕабыт матассыыкылын кэлээскэтигэр олорсон, сүөһүнү хайдах эмтиирин көрө барсарбыт, оҕус борооннору аттыырыгар көмөлөһөн “ассистенныырбыт”. Ол кэмҥэ, аҕабыт сүөһүнү эмтээн үтүөрдэрин көрөн, кини кыайбатаҕа-сатаабата суох дии саныырбыт, киэн туттарбыт. Кэлин, Өктөмҥө үлэһит буолан үлэлии кэлбиппэр, саастаах дьон, ким оҕотоҕун диэн ыйыттахтарына, Бэтэринээр Куола кыыһабын диэтэхпинэ, аҕам манна кэлэн соноҕос аттаабытын, биэ, ынах кыайан төрөөбөккө моһуогурбуттарыгар көмөлөһөн төрөппүтүн үгүстүк кэпсииллэрэ.
Ол курдук аҕабыт, хас да дэриэбинэнэн сылдьан, төһөлөөх элбэх сүөһүнү, сылгыны өлөр өлүүттэн быыһаабытын, элбэх дьон истинник ахтан-санаан ааһаллара.
Аҕам үлэлээбитин тухары туһааннаах үлэтигэр олус эппиэтинэстээхтик сыһыаннаһара. Кыһыҥҥы тымныыга сыарҕалаах атынан, сайыҥҥы куйааска матассыыкылынан, түүн да, күнүс да буоллун, биир эмит киһи кэлэн, сүөһүтэ кыайан төрөөбөтөҕүнэ, ыарыйдаҕына, бэтэринээрскэй суумкатын сүкпүтүнэн көмөлөһө барара. Ол тухары биирдэ да барбаппын диэн аккаастаммытын өйдөөбөппүт. Бэйэтэ да үлэтин дьин ис сүрэҕиттэн сөбүлүүр, астынар буолан, хаһан да бэтэринээр үлэтэ кирдээх-хахтаах, ыарахан диэн үҥсэргээбэт этэ.
“ Сүөһү син биир киһи курдук, ол гынан баран атына диэн, туга ыалдьыбытын сатаан эппэт, диирэ аҕабыт.
Сотору-сотору аҕабытыгар куораттан учуонайдар тахсаллара. Кинилэр научнай үлэлэрин суруйалларыгар аҕабыт практик-бэтэринээр буолан, эксперимент ыыталларыгар көмөлөһөрө, сүбэ-ама биэрэрэ. Кэлин бэтэринээрнэй наука биллэр учуонайдара буолан тахсыбыт А. А Хочка, В. М. Дмитриевка, С. В. Карповка научнай үлэлэригэр биһиги аҕабыт өҥөтө эмиэ баар. Маны таһынан, ОПХ-ҕа тыа хаһаайыстыбатын салайар кадрдарын бэлэмниир техникумун студеннара практикаҕа кэлэллэрэ. Кинилэри аҕабыт бэйэтин кытта илдьэ сылдьан, сүөһүттэн хаан ыларга, эмтииргэ-томтуурга сүбэлиирэ-амалыыра, практикаларын салайара. Саҥа үөрэҕи бүтэрэн кэлбит ветеринар оҕолорго аҕа табаарыс быһыытынан ыйан-кэрдэн, сүбэлээн-амалаан биэрэрэ.
Аҕабыт икки төгүл научнай бэтэринээринэй экспедиция састаабыгар киирсэн, Өлөөн уонна Аллайыаха улуустарыгар табалар сибирскэй язванан ыалдьыбыттарыгар, командировкаҕа барса сылдьыбыта.
Аҕабыт баара-суоҕа 47 сааһыгар эмискэ суох буолбута.
Аҕабыт үлэлээбит үлэтин туоһуларынан буолаллар:
“РСФСР Тыатын хаһаайыстыбатын туйгуна” бэлиэ, В. И. Ленин 100 сыллаах юбилейнай мэтээл, элбэх грамоталар, туоһу суруктар.
Аҕабыт туйаҕын хатаран, талан ылбыт идэтин салҕаан мин, кыыһа Кардашевская Надежда Николаевна Өктөмнөөҕү ветеринарнай лечебницаҕа сэбиэдиссэйинэн 2008 сылтан, быраатым Петров Афанасий Николаевич Нөмүгүтээҕи ветеринарнай лечебницаҕа ветеринарнай бырааһынан 2011 сылтан үлэлии-хамсыы сылдьабыт. Аҕабыт ситэ олорботох олоҕун, дьыалатын оҕолоро, сиэннэрэ, хос сиэннэрэ салгыыллар.