Кыайыы 80 сылыгар

Аҕа дойду Улуу сэриитигэр Новгород уобалаһын Старорусскай оройуонугар Ильмень күөлгэ буолбут хабыр хапсыһыыга Саха сириттэн хорсуннук кытта сылдьан сырдык тыыннара быстыбыт хайыһар биригээдэтин 39 буойунун кырамтатын булан, ааттара-суоллара чуолкай суруллубут өйдөбүнньүк плиткалаан, Ийэ буорга туттарыы сиэригэр-туомугар Ил Дархан Айсен Николаев уонна Новгород уобалаһын губернаторын эбээһинэһин толорооччу Александр Дронов кытыннылар. Бу сиэргэ-туомҥа Чурапчы улууһуттан биир дойдулаах буойуттарбытын көрдөөн булууга утумнаах үлэни ыытар поисковай этэрээт оҕолоро уонна Андрей Андреевич Янцен кыттыыны ыллылар.
Ильмень күөлгэ буолбут киирсии саамай улахан, ыар өйдөбүлү хаалларбыт, саамай элбэх сүтүгү таһаарбыт кыырыктаах кыргыһыы этэ. Биһиги Чурапчыбытыттан бу кыргыһыыга охтубут дьоммут кырамталара көстөн, хорсун, хоодуот саллааттарбыт сырдык дууһалара уоскуйан, "Воинам-якутянам - защитникам Старорусского района" пааматынньык аттыгар Ийэ сиргэ туттарылларыгар үгүс сыраларын уурбут дьоммутугар, поисковой этэрээт чилиэннэригэр уонна Андрей Андреевич Янцеҥҥа махталбытын тиэрдэбит. Чурапчы улууһа буойуттарбыт ааттара суруллубут бу пааматынньыгы туруорууга үбүнэн көмөлөһөн, өйөбүлү оҥордо.
Бу мемориалга биллэринэн Саха сирин 1589 саллаата, ол иһигэр, Чурапчы улууһун буойуттара, Старорусскай оройуон иһин кыргыһыыга охтубуттара...
Сураҕа суох сүппүт буойуттары булуу, чиэстээн-бочуоттаан көмүү сиэрин-туомун толоруу Аҕа дойду Улуу сэриитин 80 сылыгар саҕаламмыт "Бастионы памяти" диэн историко-патриотическай бырайыак үлэтин биир көрүҥэ буолар.
Ким да умнуллубат, туох да умнуллубат!