НАРАДЗІЛІСЯ:
1857 — Крашэўскі Багуслаў Юзаф Ян (г. Варшава, Польшча) — мастак, рысавальнік, ілюстратар, фатограф, энцыклапедыст, археолаг-аматар і калекцыянер. Памёр ў 1916 годзе ў вёсцы Доўгае Пружанскага раёна Брэсцкай вобласці.
1883 — Янка Маўр (сапр.Іван Міхайлавіч Фёдараў), (г. Лібава, цяпер г. Ліепая, Латвія) — беларускі пісьменнік, перакладчык, аўтар апавяданняў, аповесцяў і раманаў для дзяцей і моладзі, адзін з пачынальнікаў беларускай дзіцячай літаратуры.
1889 — Кацэнбоген Саламон Захаравіч (г. Мінск) — беларускі і расійскі філосаф і сацыёлаг, юрыст, арганізатар сацыялагічнай навукі ў Беларусі і Расіі ў 1920-х гадах.
1909 — Ерафееў Барыс Васілевіч (вёска Пендзелка, Кузнецкі раён, Пензенская вобласць, Расія) — расійскі і беларускі вучоны ў галіне фізічнай хіміі, доктар хімічных навук (1940), прафесар (1941), акадэмік Акадэміі навук БССР (1947). Заслужаны дзеяч навукі БССР (1979).
1918 — Прахарэнка Іван Дзянісавіч (вёска Вышамір, цяпер Рэчыцкі раён, Гомельская вобласць) — беларускі эканаміст, доктар эканамічных навук (1971), прафесар (1971).
1920 — Яронька Віктар Іванавіч (г. Полацк, Віцебская вобласць) — вайсковец, артылерыст, сяржант, удзельнік Другой сусветнай вайны, Герой Савецкага Саюза (1944).
1925 — Вятошкін Віктар Дзмітрыевіч (вёска Новая Мільча, цяпер Гомельскі раён, Гомельская вобласць) — вайсковец, пяхацінец, шараговы, удзельнік Другой сусветнай вайны, поўны кавалер ордэна Славы.
1926 — Кавалёў Анатоль Фёдаравіч (вёска Даўгаполле, цяпер Гарадоцкі раён, Віцебская вобласць) — беларускі мастацтвазнавец, жывапісец, дызайнер, кандыдат мастацтвазнаўства (1973), прафесар (1992).
1928 — Самсонаў Уладзімір Паўлавіч (сяло Ерахтур, Разанская вобласць, Расія) — беларускі вучоны ў галіне раслінаводства, доктар сельскагаспадарчых навук (1998), прафесар (1998), акадэмік Нацыянальнай акадэміі навук Беларусі (2003). Заслужаны работнік сельскай гаспадаркі БССР (1978).
1931 — Гаўрусёў Сцяпан Захаравіч (вёска Нова-Аляксандраўка, цяпер Дрыбінскі раён, Магілёўская вобласць) — беларускі паэт, перакладчык.
1933 — Вітко Уладзімір Ільіч (вёска Грэск, цяпер Слуцкі раён, Мінская вобласць) — беларускі мастак. Аўтар пейзажаў, нацюрмортаў, партрэтаў.
1934 — Бакштаеў Леанід Георгіевіч (вёска Дабрынь, цяпер Ельскі раён, Гомельская вобласць) — украінскі акцёр тэатра і кіно, тэатральны педагог. Народны артыст Украінскай ССР.
1934 — Бяганская Галіна Аляксандраўна (г. Мінск) — беларускі архітэктар. Заслужаны архітэктар БССР (1976). Асноўныя работы: праэкт планіроўкі і забудовы цэнтра Мінска (1967-1973), конна-спартыўная школа ў вёсцы Ратамка (1979-1980), клуб вёскі Баяры Мядзельскага раёна (1970-1974) і іншыя.
1934 — Лукашэвіч Мікалай Антонавіч (вёска Пасінічы, цяпер Слонімскі раён, Гродзенская вобласць) — беларускі матэматык, доктар фізіка-матэматычных навук (1971), прафесар (1974).
1935 — Пярэднеў Уладзімір Пятровіч (вёска Пугачова, цяпер Докшыцкі раён, Віцебская вобласць) — беларускі вучоны ў галіне агародніцтва і аграхіміі, доктар сельскагаспадарчых навук (1994), прафесар (1995).
1936 — Каравай Уладзімір Сяргеевіч (вёска Міцкевічы, цяпер Смаргонскі раён, Гродзенская вобласць) — беларускі правазнавец, міністр юстыцыі БССР (25.12.1986-19.11.1989). Заслужаны юрыст Рэспублікі Беларусь.
1937 — Блатун Сымон Ціханавіч (вёска Кавака, цяпер Брагінскі раён, Гомельская вобласць) — беларускі пісьменнік.
1938 — Канановіч Іван Іванавіч (вёска Кукавічы, цяпер Капыльскі раён, Мінская вобласць) — беларускі пісьменнік.
1942 — Панізнік Сяргей Сцяпанавіч (вёска Бабышкі, Міёрскі раён, Віцебская вобласць) — беларускі паэт, празаік, перакладчык, публіцыст.
1950 — Пеціна Людміла Сямёнаўна (г. Мінск) — беларуская грамадская і палітычная дзеячка, старшыня грамадскага аб’яднання “Жаночы незалежны дэмакратычны рух”, член “Беларускага Хельсінскага камітэта”.
1967 — Жураўлёва Галіна Мікалаеўна (г. Лепель, Віцебская вобласць) — беларускі майстар выціванкі. На прыкладзе традыцыйнага выразання з паперы Галіна Жураўлёва сфармавала свой аўтарскі стыль, у якога аснове якога ляжыць яе філасофскі погляд, здольнасць радаваць вока і кранаць душу. У сваёй творчасці Галіна прытрымліваецца наступных тэм: беларуская міфалогія (палявік, дамавік, хатнік, балотнік і інш.); матчына любоў; святы (Дажынкі, Радуніца, Нараджэнне Хрыстова, Вялікдзень і інш.); дрэва жыцця (розныя інтэрпрэтацыі, звязаныя з сямейнай абраднасцю).
1971 — Пятрухін Сяргей Сяргевіч — брэсцкі блогер, аўтар ютуб-каналаў "Народны рэпарцёр" і " Youtube-дэпутаты", палітвязень.
1990 — Murovei (сапр. Бондар Антон Валер’евіч) (г. Смалявічы, Мінская вобласць) — беларускі рэпер, аўтар-выканаўца, бітмэйкер.

ПАМЕРЛІ:
1667 — Неверская Людвіка Марыя Ганзага (г. Варшава, Польшча) — каралева Польшы і вялікая княгіня Вялікага Княства Літоўскага, жонка апошніх каралёў дынастыі Ваза — Уладзіслава і Яна Казіміра.
1864 — Аскерка Міхал Андрэевіч (г. Магілёў) — лекар, удзельнік паўстання 1863-1864. Быў паўстанцкім камісарам у Магілёўскай і Мінскай губерніях. Нарадзіўся ў 1836 годзе ў Мінску.
1905 — Длускі Баляслаў Раман (г. Кракаў, Польшча) — дзеяч вызваленчага руху, удзельнік паўстання 1863-1864 гг, мемуарыст.
1940 — Булак-Балаховіч Станіслаў Нікадзімавіч (г. Варшава, Польшча) — беларускі польскі і расійскі вайсковы дзеяч і палітык. Афіцэр кавалерыі Рускай імператарскай арміі, генерал-маёр Белай арміі, генерал Асобнага атрада БНР, захапіўшы з сваімі аддзеламі Мазыр, абвясціў там незалежнасць БНР, камандзір добраахвотніцкіх атрадаў польскай арміі ў 1920г., удзельнік грамадзянскай вайны ў Іспаніі на баку генерала Франка.
1968 — Сакалоўскі Васіль Данілавіч (г. Масква, Расія) — беларускага паходжання савецкі ваенначальнік, Маршал Савецкага Саюза (03.07.1946).
1973 — Скіндар (дзявочае Іваноўская) Алена Леанардаўна (г. Казяніц , Польшча) — папулярызатар ведаў па беларусазнаўстве, спецыяліст у галіне конегадоўлі, перакладчыца. Супрацоўнічала з земляробчым часопісам «Саха» як спецыялістка ў конегадоўлі, пісала гаспадарчыя парады для земляробаў-беларусаў. З прыходам у 1939 годзе савецкай улады яе мужа вывезлі на ўсход, сама яна хавалася ў Вільні. Затым у родным фальварку перажыла нямецкую акупацыю. Тут схавалі ад нацыстаў дзвюх жанчын яўрэйскага паходжання — Эму Альтберг[pl] (1889—1983) і яе сястру Марыю Арнольд (1893—1995). 22 кастрычніка 2001 года за ўратаванне яўрэяў атрымала званне «Праведнікаў свету».
1976 — Былінскі (Кабылінскі) Іван Сямёнавіч (г. Мінск) — беларускі партыйны і дзяржаўны дзеяч, старшыня Савета Народных Камісараў БССР (28.06.1940-06.02.1944), першы сакратар Палескага абласнога камітэта КПСС (верасень 1944 – жнівень 1946), міністр лясной гаспадаркі БССР (1949-24.04.1953).
1978 — Хайкін Барыс Эмануілавіч (г. Масква, Расія) — беларускага паходжання савецкі дырыжор, прафесар Ленінградскай кансерваторыі, 24 гады працаваў у Маскве (Кансерваторыя, Вялікі тэатр). Народны артыст СССР (1972).
1984 — Васілеўскі Антон (г. Глівіцы, Сілезскае ваяводства, Польшча) — беларускі пісьменнік, выдавец сатырычнага часопіса «Авадзень». «Авадзень» выходзіў на беларускай мове 2 разы на месяц у Вільні ў 1924-1933 гады.
1985 — Крыштафовіч Мірон Емельянавіч (г. Брэст) — удзельнік рэвалюцыйнага руху ў Заходняй Беларусі, старшыня Брэсцкага аблвыканкама (студзень 1954 – сакавік 1959). Пахаваны на брэсцкіх Гарнізонных могілках.
1987 — Паўленка Мікалай Андрэевіч (г. Мінск) — беларускі мовазнавец, педагог, які вывучаў аспекты агульнага мовазнаўства, праблемы беларускага словаўтварэння.
1996 — Карніенка Уладзімір Якаўлевіч (г. Магілёў) — вайсковец, пяхацінец, малодшы сяржант, удзельнік Другой сусветнай вайны, поўны кавалер ордэна Славы.
1998 — Шурпа Уладзімір Канстанцінавіч (г. Гродна) — беларускі паэт, журналіст, педагог.
2004 — Арцюшэнка Рыгор (г. Саўт-Рывер, штат Нью-Джэрсі, ЗША) — беларускі грамадска-палітычны дзеяч у ЗША, актывіст Аб’яднання беларуска-амерыканскай моладзі, у 1970-1980-я гады належаў да Беларускага кангрэсавага камітэта Амерыкі. Браў актыўны ўдзел у жыцці парафіі Св. Ефрасінні Полацкай, цягам 12 гадоў узначальваў карпарацыю «Белер-Мінск». Разам з жонкай Соняй шмат зрабіў для дапамогі дзецям — ахвярам чарнобыльскай катастрофы. Пахаваны на могілках Беларускай праваслаўнай царквы Святой Ефрасінні Полацкай.
2005 — Бандарэнка Мікалай Аляксандравіч — беларускі гісторык, архівіст, археограф. Лаўрэат Дзяржаўнай прэміі Беларусі (2002).
2006 — Кручынскі Генрых Уладзіслававіч (г. Мінск) — беларускі стаматолаг-хірург, доктар медыцынскіх навук (1971), прафесар (1973). Заслужаны дзеяч навукі БССР.
2006 — Міхал Ясень (сапр. Гольдман Міхаіл Аронавіч) (г. Мінск) — беларускі паэт-песеннік. Пахаваны на мінскіх Усходніх могілках.