1633 — новаабраны кароль Рэчы Паспалітай Уладзістаў IV з-пад Варшавы павёў войска на дапамогу абложанаму Смаленску.
1794 — у Берасці, пасля адступлення адтуль у напрамку Пінска расійскага атрада пад камандаваннем палкоўніка Часменскага, адбываецца сход “грамадзян і жыхароў ваяводства Берасцейска-Літоўскага з паветам Кобрынскім і ўсіх парафій, межы таго ваяводства складаючых”. Старшынстваваў на тым сходзе стараста берасцейскі Казімір Нестар Сапега, сход падтрымаў паўстанне на чале з Тадэвушам Касцюшкам.
1917 — па мітынгу ў Маскоўскім універсітэце па ініцыятыве групы беларускіх інтэлігентаў на чале з Я. Васілевічам, А. Цвікевічам, Ф. Туруком была заснавана Беларуская народная грамада — грамадска-палітычная і дабрачынная арганізацыя неанародніцкага кшалту, дзейнічала ў Расіі сярод бежанцаў-беларусаў у 1917-1918.
1929 — пачала працу камісія ЦК ВКП(б) якая вывучала практыку правядзення новай нацыянальнай палітыкі ў БССР, высновы камісіі былі падставай для рэпрэсій беларускай інтэлігенцыі.
1965 — на Чырвонай плошчы ў Маскве упершыню пасля завяршэння Другой сусветнай вайны быў праведзены вайсковы парад. Да 1995 года парады ў Дзень Перамогі праводзіліся толькі ў юбілейныя годы – у 1985 і 1990.
1953 — у Мінску выйшаў першы нумар літаратурнага часопіса "Маладосць".
1995 — у Мсціслаўлі адкрыўся гісторыка-археалагічны музей (заснаваны ў 1988 г.).

НАРАДЗІЛІСЯ:
1708 — Лапацінскі Ян Дамінік (мястэчка Лапацiна, цяпер Мсціслаўскі раён, Магілёўская вобласць) — рэлігійны і дзяржаўны дзеяч Вялiкага Княства Лiтоўскага, канонік віленскі (з 1732) і схаласцік (з 1753), духоўны сакратар вялікі літоўскі (1755-1762), біскуп жамойцкі (з 1762).
1820 — Ромер Севярын Мікалай (маёнтак Губінка ў Гродзенскім павеце) — апошні маршалак шляхты Гродзенскага павета, удзельнік паўстання 1863-1864 гадоў, паўстанцкі касір Гродзенскага павета. Палітссыльны ў Табольск Томскай губерні.
1849 — Цэраскі Вітольд Карлавіч (г. Слуцк, Мінская вобласць) — расійскі астраном, член-карэспандэнт Пецярбургскай акадэміі навук (з 1914 года). Адзін з піянераў выкарыстання фатаграфіі ў астраноміі, заснаваў маскоўскую школу астрафотаметрыі.
1892 — Мялешка Міхаіл Вінцэнтавіч (вёска Скары, цяпер Мядзельскі раён, Мінская вобласць) — беларускі паэт, празаік, публіцыст, гісторык, этнограф. Вязень ГУЛагу.
1904 — Дзеніскевіч Мікалай Міхайлавіч (вёска Закаблукі, цяпер Мінскі раён, Мінская вобласць) — беларускі партыйны дзеяч, другі сакратар ЦК КП(б)Б і член бюро ЦК КП(б)Б. Вязень ГУЛагу.
1904 — Касцюкевіч Мікалай Ігнатавіч (вёска Варкавічы, цяпер Слуцкі раён, Мінская вобласць) — беларускі вучоны ў галіне лясной метэаралогіі, доктар сельскагаспадарчых навук (1961), прафесар (1962). Заслужаны дзеяч навукі БССР (1975).
1911 — Ліхадзіеўскі Сцяпан Іванавіч (вёска Баславічы, цяпер вёска Барок, Слуцкі раён, Мінская вобласць) — беларускі паэт, перакладчык, крытык, літаратуразнаўца. Вязень ГУЛагу.
1913 — Івашын Васіль Уладзіміравіч (вёска Ляхавічы, цяпер Дзяржынскі раён, Мінская вобласць) — літаратуразнавец, педагог, доктар філалагічных навук (1965), прафесар (1973).
1916 — Друян Ібрагім Леанідавіч (г. Еўпаторыя, Україна) — беларускі лекар, выкладчык, кандыдат медыцынскіх навук (1959). Заслужаны лекар БССР (1964).
1918 — Філімонаў Аляксандр Андрэевіч (вёска Кучын, цяпер Кармянскі раён, Гомельская вобласць) — вайсковец, танкіст, старшы лейтэнант, удзельнік Другой сусветнай вайны, Герой Савецкага Саюза (15.06.1945).
1924 — Вятчаннікаў Кім Аляксандравіч (вёска Рэпкі, Ізяслаўскі раён, Хмяльніцкая вобласць, Україна) — беларускі вучоны ў галіне санітарыі і гігіены, доктар медыцынскіх навук (1972).
1924 — Міцуль Эдуард Леанардавіч (станцыя Добрык, Унецкі раён, Бранская вобласць, Расія) — беларускі спявак (барытон). Заслужаны артыст Беларусі (1970).
1926 — Слаўкоў Уладзімір Іванавіч (г. Курск, Расія) — беларускі акцёр. Заслужаны артыст БССР (1967). Памёр ў 1995 годзе ў Гомелі.
1927 — Назаранка Мікалай Пятровіч (гарадскі пасёлак Сямёнаўка, Палтаўская вобласць, Україна) — беларускі жывапісец. Працуе ў розных жанрах жывапісу ў рэалістычнай манеры.
1929 — Асецкі Людвіг Пятровіч (вёска Продвіна, цяпер Бабруйскі раён, Магілёўская вобласць) — беларускі графік. Працаваў у галіне станковай і кніжнай графікі, манументальнага жывапісу. Заслужаны дзеяч мастацтваў БССР (1981).
1930 — Цэдрык Міхаіл Сямёнавіч (вёска Доўгі Лог, цяпер Бярэзінскі раён, Мінская вобласць) — беларускі фізік, педагог, доктар фізіка-матэматычных навук (1984), прафесар (1985). Заслужаны работнік вышэйшай школы БССР (1980).
1936 — Шматаў Віктар Фёдаравіч (гарадскі пасёлак Камарын, Брагінскі раён, Гомельская вобласць) — беларускі мастак-жывапісец, доктар мастацтвазнаўства. Працаваў у жанры тэматычнай карціны, пейзажа, карыкатуры, экслібрыс.
1937 — Бараноўскі Анатоль Васільевіч (г. Мінск) — беларускі мастак-жывапісец, педагог. Працаваў у жанры пейзажа, партрэта, тэматычнай карціны. Заслужаны дзеяч мастацтваў Беларусі (1992). Народны мастак Беларусі (2012).
1937 — Мыслівец Валянцін Цімафеевіч (вёска Хазянінкі, цяпер Пухавіцкі раён, Мінская вобласць) — беларускі пісьменнік.
1937 — Шыманец Лявон (г. Стоўпцы, Мінская вобласць) — дзеяч беларускай дыяспары ў Францыі, шматгадовы старшыня Згуртавання беларусаў Францыі «Хаўрус», сябра Рады БНР.
1941 — Давідзенка Леанід Рыгоравіч (г. Мінск) — беларускі скульптар, жывапісец, графік, педагог.
1952 — Рэўтовіч Рэгіна Іосіфаўна (вёска Даўнары, Стаўбцоўскі раён, Мінская вобласць) — беларуская паэтка.
1953 — Азярэц Аляксандр Уладзіміравіч (вёска Гарбацэвічы, Бабруйскі раён, Магілёўская вобласць) — беларускі дзяржаўны дзеяч, міністр энергетыкі Рэспублікі Беларусь (05.05.2006-18.04.2013).
1953 — Хурсік Віктар Уладзіміравіч (чыгуначная станцыя Уборак, Асіповіцкі раён, Мінская вобласць) — беларускі журналіст, публіцыст, пісьменнік, выдавец, грамадскі дзеяч.
1955 — Емяльянчык Уладзімір Пятровіч (вёска Вялікія Лукі, Баранавіцкі раён, Брэсцкая вобласць) — беларускі паэт, гісторык, кандыдат гістарычных навук (1987), дацэнт.
1959 — Рубанік Васіль Васілевіч (вёска Бутава, Ушацкі раён, Віцебская вобласць) — беларускі вучоны ў галіне тэхнічнай акустыкі, доктар тэхнічных навук (2005), член-карэспандэнт Нацыянальнай акадэміі навук Беларусі (2014).
1988 — Баразенка Аляксандр Аляксандравіч (г. Пінск, Брэсцкая вобласць) — незалежны журналіст, вязень сумлення, беларускі палітвязень. Лаўреат Нацыянальнай прэміі за 2008 г. ў галіне абароны правоў чалавека, заснаванай Хартыяй’97 у 1998 годзе.

ПАМЕРЛІ:
1794 — Касакоўскі Юзаф Казімір (г. Варшава, Польшча) — рымска-каталіцкі і дзяржаўны дзеяч Рэчы Паспалiтай, пісар вялікі літоўскі (з 1775), тытульны біскуп цыненскі і біскуп-суфраган троцкі (1775-1781), біскуп інфлянцкі (з 1781). Падчас паўстання начале з Касьцюшкам 22 красавiка 1794 ягоны маёнтак сканфіскаваў паўстанцкі ўрад, а самога яго неўзабаве асудзілі і павесілі 9 траўня 1794 ў Варшаве як здрадніка.
1891 — Красінскі Адам Станіслаў (г. Кракаў, Польшча) — беларускі філолаг, паэт, перакладчык, каталіцкі рэлігійны дзеяч, прапаведнік, прафесар Рымска-каталіцкай акадэміі ў Санкт-Пецярбургу (1853-1858), віленскі біскуп (1858-1864). За адмову асудзіць паўстанне 1863-1864 гадоў і яго ўдзельнікаў на распараджэнне Міхаіла Мураўёва быў арыштаваны і высланы ў Вятку (1864-1882).
1920 — Фабіян Шантыр (г. Мінск) — удзельнік Першага Ўсебеларускага з’езда, лідар левай плыні сярод яго дэлегатаў, растраляны чэкістамі.
1945 — Матрынчук Іосіф Васілевіч (Польшча) — вайсковец, лётчык, падпалкоўнік, удзельнік савецка-фінскай і Другой сусветнай вайны, Герой Савецкага Саюза (20.05.1940). Пахаваны ў горадзе Піла ў Польшчы.
1966 — Блішч Міхаіл Андрэевіч (г. Мінск) — беларускі мастак тэатра, жывапісец. Працаваў у сцэнаграфіі, станковым жывапісу і графіцы. Выканаў афармленне оперных і балетных спектакляў Беларускага дзяржаўнага акадэмічнага Вялікага тэатра оперы і балета. У станковым жывапісу напісаў пейзажы. Да станковой графікі дачыняюцца твор "Беларускі тэатр «Батлейка» (1959), эскізы дэкарацый спектакляў, эскізы касцюмаў для беларускіх танцавальных і харавых калектываў.
1972 — Конанаў Міхаіл Дзмітрыевіч (г. Ленінград, цяпер г. Санкт-Пецярбург, Расія) — вайсковец, маёр, удзельнік Другой сусветнай вайны, Герой Савецкага Саюза (26.10.1944).
1979 — Занько Фёдар Пятровіч (вёска Ворань, Лепельскі раён, Віцебская вобласць) — вайсковец, лётчык, старшыня, удзельнік Другой сусветнай вайны, поўны кавалер ордэна Славы.
1981 — Алісейка Уладзімір Цітавіч (г. Краснадар, Расія) — вайсковец, старэйшы сяржант, удзельнік Другой сусветнай вайны, Герой Савецкага Саюза (10.01.1944).
1984 — Лягенчанка Іван Сяргеевіч (г. Мінск) — акушэр-гінеколаг, кандыдат медыцынскіх навук, дацэнт (1951). Заслужаны лекар БССР (1956).
1997 — Васкабойнікаў Васіль Міхайлавіч (г. Віцебск) — беларускі вучоны ў галіне ветэрынарыі, доктар ветэрынарных навук (1967), прафесар (1968).
2014 — Сімановіч Давід Рыгоравіч (г. Віцебск) — беларускі паэт, перакладчык.