Предыдущая публикация
Нешличи
Дунъяличив наб, хIуван,
ХIейуб адам ахIерси,
Дугурбазир – гунзрачи,
ХIерели – гьунчи хIерси.
Гунзри камли дикьади,
Гьунчив камли чейира.
Чуйнара, чехусайван,
Чурхли хIези гъайира.
ГIур дигIянни ва гIянцIли
ГIянцIикIира ну бецIван,
Вебшили шагьарлизи,
МицIирси, цунси децIван.
Илисгу набчи гьанна
Бунагьуни акибти,
Дила лишанти, иза
Шявси рангли дакибти.
Ну хIед дурхIяхIелицун
Шаддеш-талихIла хIебри…
Мабагьас хIела агри –
Улгулра дуги-хIери.
Амма, вегIебш, гIямрула
Лер дазура ахирра.
ГьаббикIур гьарилличи
БебкIа-хуху ахирра.
Я Аллагь, хIела рухIлис
Алжана гьунибааб,
ХIед хIулкIудеш-талихIла
Илабалра пай бааб…
Наб ил пишбирхъниличи
Ташмишлира хIябилра,
ГIязабуркIули кавлас,
ГIямруливан, хIяривра.
ЧапIлира, чиллализиб
Чякаван, чарх руржули,
БекI ва уркIи дурцули,
ДецI держличил бужули.
Неш, хIу харирареси
Хабар дила агара,
Хумарти, кахти дурес
Вирус сецад-дигара.
Деза-хабарла улка
Хасмушуназиб саби,
Дарула гавра гягIра –
Гьаннала гьава сари.
Кабуршути, бирхъути –
Чили, чинаб буйгIути…
Жанивар гIямру сари,
Кьясдеш, гьими делгIути.
Тухри, давлуми дутIес,
Дергъгъуна гъаза саби,
Душмандешли, гашили
Шагьурти дегIи сари…
Шилизир, шанти-ургар
Цундешличил рурибси,
Неш, хIякьикьат хIебагьес,
ГьанкI башаб хIед муриси.
Чили бала, белики,
Балагьла аргъ барсбиэс…
Хариси хабар хили,
Дигиб наб хIечи ваэс.
Амир Гъази
📷: Зухра Гаджиева
Следующая публикация
Нет комментариев