Gapyl adam, gider bolsaň

Keremli ýoldaşyň galar.
Jellat gelip jan alanda,
Ýyglaşyp, gardaşyň galar.
Tende myhman eziz janyň,
Gazangyl nury-imanyň,
Supra ýaýyp, dökgül nanyň,
Bu dünýäde aşyň galar.
Bu dünýäni tutma gyzgyn,
Ýoldan çykyp, bolma azgyn.
Biwepadyr, umyt üzgün,
Gum guwanar, läşiň galar.
Nämährem gören gözleriň,
Şol gybat eden sözleriň,
Eňreşer ogul-gyzlaryň,
Göwre gidip, goşuň galar.
Ajal geldi, nobat ýetdi,
Kimse bu dünýäni tutdy,
Magtymguly ömrüň ötdi,
Dat edip syrdaşyň galar.
Magtymguly