Юпа уйӑхӗн 11-мӗшӗнче Патӑрьел округӗнчи Нӑрваш Шӑхаль ялӗнче "Хӗрарӑм, сан умӑнта таятӑп пуҫӑма" регионсем хушшинче ҫиччӗмӗш ҫул йӗркелекен конкурсӑн пӗтӗмлетӗвӗ шавлӑн кӗрлесе иртрӗ.

Аса илтеретӗп, ӑна ЧНК "Чӑваш хӗрарӑмӗ" комитечӗ йӗркелесе пырать.
Конкурса икӗ тапхӑрта ҫӗнтернӗ Йӗпреҫ, Шӑмӑршӑ тата Елчӗк муниципаллӑ округсен чи маттур хӗрарӑмӗсем хутшӑнчӗҫ.
Ал-ӗҫ тӑвасси, чӑваш апачӗ хатӗрлесси, хӑй ҫинчен каласса парасси, чӑваш йӑли-йӗркине кӑтартасси тата пултарулӑх конкурсӗнче тупӑшса ҫӗнтернисене пурне те тӗрлӗ номинацисенче палӑртрӑмӑр.
Гран-прие вара Йӗпреҫ тӑрӑхӗн чи пултаруллӑ хӗрарӑмӗ Оксана Иванова ҫӗнсе илчӗ.
Ҫӗнтерӳҫӗсене пурне те Павел Николаевич Вязов тивӗҫтернӗ хаклӑ парнесемпе чысларӑмӑр.
Каласа хӑвармалла, Юрий Александрович Зорин та аяккинче юлмарӗ, шӑл юсама сертификат пачӗ.
Комитет пайташӗсемпе йӗркелекенсене инҫе ҫула кайса килме машинӑпа Николай Федорович Угаслов тивӗҫтерчӗ.
Пурне те пысӑк тав! Ӗҫӗрсем яланах ӑнса пыччӑр!