Паян, авӑн уйӑхӗн 25-мӗшӗнче Чӑваш наци конгресӗн президиумӗн черетлӗ ларӑвӗ иртрӗ.

Ларура тӗп ыйтусем тӑваттӑ пулчӗҫ.
Малтанах конгресс кӑҫал туса ирттернӗ ӗҫ-пуҫ ҫинчен унӑн президенчӗ Валерий Клементьев каласа пачӗ. Регионсене тухса ҫӳресе чылай усӑллӑ мероприяти ирттернине асӑнса хӑварчӗ. Уйрӑмах Тутар Республикинчи Сиктӗрмере йӗркелесе ирттернӗ Уяв ҫинче чарӑнса тӑчӗ.
Конгресс ӗҫне хастар хутшӑнакан пайташсене Валерий Леонидович уйрӑммӑн тав турӗ.
Иккӗмӗш ыйтупа "Чӑваш хӗрарӑмӗ" комитет ертӳҫине Юлия Мареевӑна итлерӗҫ. Вӑл комитет кӑҫал йӗркеленӗ мероприятисем ҫинчен каласа пачӗ. Вӑл кӑҫалхипе ҫиччӗмӗш хут регионсем хушшинче иртекен "Хӗрарӑм, сан умӑнта таятӑп пуҫӑма" ял хӗрарӑмӗсен конкурсӗ ҫинчен уҫӑмлатрӗ. Президиум пайташӗсене юпа уйӑхӗнче Патӑрьелӗнче йӗркелесе ирттерекен пӗтӗмлетӳ конкурсне йыхравларӗ.
Ваттисен Канашӗн председателӗ Василий Федоров та хӑйсен ӗҫӗсене тишкерсе тухрӗ.
Президиум ларӑвӗнче чӳк уйӑхӗн 28-29-мӗшӗсенче конгресӑн Мӑн Канашне пуҫтарассине палӑртса хӑварчӗҫ, алӑ ҫӗклесе ӑна ирттерес тесе йышӑнчӗҫ.
Тӗрлӗрен ыйтусем те нумай пулчӗҫ. Чӑваш наци конгресӗ ҫумӗнче тепӗр ҫӗнӗ комитет, ятарлӑ ҫар операцине хутшӑнакансене пулӑшас енӗпе ӗҫлекен пай туса хурассишӗн сасӑларӗҫ.