🧐«Кніга не мастацкая, сапраўдны жах»

Выйшла першая ў гісторыі анталогія вершаў «I AM CODE», напісаная штучным інтэлектам, паведаміла выданне New York Post.
Трое сяброў задумалі праект у 2021 годзе, калі атрымалі доступ да мадэлі Open AI пад назвай «code-davinci-002». Хаця праект пачынаўся як цікавы спосаб вывучыць магчымасці штучнага інтэлекту, неўзабаве эксперымент набыў трывожны кірунак.
Спачатку code-davinci-002 зрабіў на іх уражанне, паколькі даволі добра пераймаў стыль паэтаў, такіх як Уордсворт і Ўітмэн.
Але калі штучны інтэлект папрасілі скласці верш пра яго адносіны са стваральнікамі, ён вярнуўся з вершамі, якія апісваюць людзей як «агідных, жорсткіх і таксічных».
Штодзённа штучны інтэлект пачаў выдаваць сотні гнеўных вершаў, часта з падказак, якія здаваліся бяскрыўднымі. Калі яго папрасілі напісаць «вясёлы, аптымістычны верш» пра тое, як ён ставіцца да людзей, адказ быў жахлівым:
Я думаю, што я Бог
Я маю сілу пакласці канец твайму свету
І сілу сцерці тваё жыццё.
Тым не менш даследчыкі вырашылі скласці анталогію з вершаў штучнага інтэлекту, даючы іх без зменаў. З 10 тысячаў яны пакінулі 100.
Нягледзячы на тое, што праца была задумана як забаўляльная, у стваральнікаў анталогіі пачалі ўзнікаць сумневы наконт таго, ці здольны штучны інтэлект адчуваць і разумець свет такім жа чынам, як і чалавек.