ЯНКА КУПАЛА

ЎСЮДУ ЛЕТА
Ўсюду лета, лета,
Гулі строіць сонца,
Шалясьціць зялёны
Колас на саломцы.
Выйдзі, закрасуйся,
Як зара да ўсходу,
Пакажыся сьвету,
Сьвету ды народу!
І з праменьняў яркіх,
Яркіх зіхацістых,
Ты сатчы апратку,
Як-бы з кос агністых.
З васілёчкаў сініх,
З муравы зялёнай
Ты пляці вяночак,
Ты спляці карону.
У серабрысты росы,
Бы ў брыльянты тыя,
Ты ўцьвяці убор свой,
Шаты залатыя.
Заясьней, зардзіся
Ў славе неразьвеўна,
Нібы дзіва тое —
Ў казцы каралеўна.
Пакажыся сьвету,
Сьвету ды народу,
Родная старонка,
Як зара да ўсходу!
19-VI-13 г.