)
BBC News dunyoning termoyadro urushi yoqasida turgani haqida xabar berayotgandek tasvirlangan toʻqima video yashin tezligida tarqalib ketdi.
Video yolgʻon boʻlsada, koʻplab tomoshabinlar xavotirga tushgancha BBCga qoʻngʻiroq qila boshladilar. Aftidan ular videoning haqiqiyligiga ishongan edilar.
Videoning tarqatilishi ortida turgan kompaniya YouTube'dagi akkauntida bu xabar toʻqima ekanligini aniq maʼlum qildi. Sal oʻtib bu akkaunt tarmoqdan olib tashlandi.
WhatsApp orqali tarqalgan videoda bunday izoh yoʻq edi. Shu sababli koʻplab foydalanuvchilar videodagi daʼvo haqiqiy ekanligiga ishonib, laqqa tushdilar.
Videoda nima bor edi?
BBC News'ning rasmiy introsi bilan boshlanadigan videoda ayni oʻxshash yangiliklar xonasidan gapirayotgan suxandonni koʻrish mumkin. Koʻrinishidan gʻamgin suxandon "Rossiya va NATO oʻrtasida jiddiy hodisa boʻlgani" haqida eʼlon qiladi.
"Aniq tafsilotlar hozircha mavjud emas. Ilk olingan maʼlumotlarda Rossiyaning razvedkachi uchogʻi NATO kuchlariga qarashli harbiy kemalari tomonidan urib tushirilgani aytilmoqda", deydi u.
Shundan soʻng ushbu reportaj yanada qiziqarli va qoʻrqinchli tus ola boshlaydi. Suxandon Rossiya harbiy kemalari NATOga qarshi hujumga oʻtgani, Buyuk Britaniya Qirollik oilasi xavfsiz yerga koʻchirilgani, hukumat fuqarolarning uyda qolishini tavsiya qilayotgani va boshlanib ketgan termoyadro urushi oqibatida Germaniyaning Mayns shahri batamom yoʻq boʻlib ketgani hamda Frankfurtning bir qismi katta zarar koʻrgani haqida hikoya qiladi.
BBC nomidan shunchalik ishonarli ishlangan ushbu videoning baribir baʼzi joylari xato ekanligini koʻrish mumkin edi.
Uning toʻqima ekanligini qanday aniqlash mumkin?
Ushbu videoda BBC logotipi va brend nomidan foydalanilgan boʻlsada, harflarning yozilish uslubi hamda logotipning joylashuv oʻrni juda farqli edi.
Bundan tashqari sizga ijtimoiy tarmoqlar yoki messenjerlar orqali yirik media tashkilotiga tegishli ekanligi daʼvo qilinayotgan video joʻnatilsayu, lekin sizda ushbu videoning haqiqiyligiga shubha tugʻilsa, u holda uni oʻsha tashkilotning rasmiy vebsaytidan izlab koʻring.
Videoda daʼvo qilingan holatda berilayotgan xabarning toʻqima ekanligini aniqlash yanada oson. Agar dunyoda termoyadro urushi boshlangudek boʻlsa, BBC bu haqida xabar berayotgan yagona xizmat boʻlmaydi. Bu holat zudlik bilan deyarli barcha xabar xizmatlarining asosiy mavzusiga aylanadi.
Bu kimning ishi edi?
Mazkur videoda suxandon rolьini akter Mark Ris ijro etgan va u 2016 yilda bir Irlandiya kompaniyasi tomonidan tayyorlangan.
Janob Ris BBCga shunday deydi: "Bu video Benchmarking Assessment Group nomli kompaniya tomonidan ruhiy holatni tekshiruvchi vosita sifatida yaratilgan. Kompaniya oʻz mijozlarining ulkan falokatga nisbatan qanday munosabatda boʻlishini aniqlamoqchi edi."
"YouTube'ga kompaniyaning rasmiy akkaunti nomi bilan yuklangan video ostida uning toʻqima ekanligi aniq yozib qoʻyilgan edi. U hatto BBC News'ning asl talqiniga ham oʻxshamasdi. Oʻxshashiga ham harakat qilinmagan edi."
"Akter sifatida qilgan ishim yashil mato oldida turib, xabarni oʻqib berish boʻlgan, xolos. Men videoning montaj jarayonlariga aralashmaganman."
Kompaniyaning rasmiy websaytidagi maʼlumotlarga koʻra, Benchmarking Assessment Group "2006 yil Irlandiyada tashkil qilingan" va oʻz mijozlari bilan "tanlash, rivojlanish va iqtidorni boshqarishni baholash uslublari"ni yuksaltirish yoʻlida hamkorlik qiladi.
Kompaniyaning baholash xizmatlari boʻlimi boshligʻi Devid Ringvud BBCning video boʻyicha izoh soʻrab yoʻllagan xabariga javob bermadi.
BBC bu haqida nima deydi?
Payshanba kuni ertalab BBC matbuot xizmati "Rossiya va NATO ziddiyati toʻgʻrisida BBC News nomidan ekanligi daʼvo qilinayotgan video keng tarqatilayotgani" haqida xabardor ekanligini maʼlum qildi.
"YouTube'ga yuklangan ushbu videoda uning toʻqima ekanligi maʼlum qilingan", deb yozib qoldirdi BBC matbuot xizmati oʻzining Twitter sahifasida. BBCUZBEK.COM bilan Telegram orqali +44 7858860002 nomeri bilan bogʻlaning. Telegram kanalimiz: https://t.me/bbcuzbek http://www.bbc.com/uzbek/world-43728435
https://www.youtube.com/watch?v=ii2LJmOtIuw
https://youtu.be/74-MW9is-Oo
https://youtu.be/6tVoDd7dRp4
Присоединяйтесь к ОК, чтобы подписаться на группу и комментировать публикации.
Комментарии 10