"Атлетико" клуби ҳужумчиси Фернандо Торрес "Реал"га қарши кечадиган Европа Чемпионлар лигасининг жавоб учрашуви олдидан ўзининг фикрлари билан ўртоқлашди.

"Ўйинга беэътибор бўла олмаймиз. Жамоамиз олдинда бизни нима кутаётган бўлса ўшанга тайёр. Ҳар бир ўйин алоҳида тарихга эга. Биз ярим финалга чиқишимизга ишонамиз.
"Реал"нинг жароҳатланган футболчиларига келсак: бу нарса "Атлетико"га устунлик бермайди.
Икки жамоада ҳам бир-бирининг ўрнини босадиган футболчилар етарли. Албатта, бу вазиятдан фойдаланиб қолишга ҳаракат қиламиз, аммо кўп нарса кута олмаймиз", - дейди Marca нашри Торрес сўзларини келтириб.
Эслатиб ўтамиз, жароҳати боис ярим ҳимоячилар Гарет Бэйл ва Лука Модричлар майдонга тушишмайди. Бундан ташқари Карим Бенземанинг иштироки ҳам савол остида.