📱 Смартфонға вирус эләккәнен нисек белеп була һәм был осраҡта нимә эшләргә?

Башҡортостан Дәүләт идараһының һанлы үҫеш министрлығы белгестәре ошо хаҡта аңлата.
Әгәр смартфонығыҙ:
– әкренерәк эшләй башлаһа һәм заряды тиҙ бөтһә;
– үҙенән-үҙе һүнеп яңынан эшләй башлаһа;
– ҡулланмаһағыҙ ҙа тиҙ йылынһа;
– үҙегеҙ ҡуймаған ҡушымталар килеп сыҡһа, ә ҡуйылғандары сәйер рөхсәт талап итһә, мәҫәлән, СМС йәки «Фонарик» ҡушымтаһы өсөн геопозицияға инеү һораһа;
– СМС йәки шылтыратыуҙар исемлегендә таныш булмаған номерҙар йәки һеҙ ебәрмәгән хәбәрҙәр сыҡһа;
– элек булмаған реклама йәки белдереүҙәр килеп сыҡһа, телефонығыҙҙа вирустың булыуы ихтимал.
🛡 Телефонда зарарлы ҡушымта тапһағыҙ, нимә эшләргә?
– «авиарежим» ҡабыҙығыҙ. Был мутлашыусыларға мәғлүмәт тапшырыуҙы туҡтата.
– Мутлашыусылар һеҙҙең иҫәптәрегеҙгә инеп өлгөрмәһен өсөн банкҡа икенсе телефондан шылтыратығыҙ. Ярҙам хеҙмәте номерын рәсми сайтта йәки банк картаһында эҙләп табығыҙ. Операторға телефонығыҙҙың вирус менән зарарланғанын әйтегеҙ, карталарығыҙҙы ябыуҙарын, рөхсәтһеҙ алып барылған операцияларҙы туҡтатыуҙарын һорағыҙ.
– Мөһим аккаунттарығыҙҙа – Дәүләт хеҙмәттәрендә, банктарҙа, социаль селтәрҙәрҙә, почтала һәм маркетплейстарҙа әүҙем сессияларығыҙҙы тикшерегеҙ. Бының өсөн хәүефһеҙ ҡоролмалар – компьютер йәки зарарланмаған телефон ҡулланығыҙ. «Хәүефһеҙлек», «Һеҙҙең ҡоролмалар», «Актив сессиялар» бүлектәрендә бөтә шикле сессияларҙы һәм таныш булмаған ҡоролмаларға инеүҙе туҡтатығыҙ.
– Йәшәү урыны буйынса полиция бүлегенә барығыҙ. Үҙегеҙ менән паспорт һәм зарарланған телефонығыҙҙы алығыҙ.
Әгәр смартфондан вирусты нисек алырға белмәйһегеҙ икән, иң яҡшыһы – сервис үҙәге белгестәренә мөрәжәғәт итеү.
#Аңлатабыҙ_Башҡортостан