1.Ак тайганыҥ арчынын,
Айга бажыр ӱстибис.
Ак јаларга бажырып,
Алкыш сурап келдибис.
Кӧк тайганыҥ арчынын
Кӱнге бажыр ӱстибис
Кӧк јаларга бажырып,
Алкыш сурап келдибис.
2. Ат арчынду тайганыҥ
Тайгазына баш болзын!
Алаканга јайкаган
Адазына баш болзын!
Кой арчынду тайганыҥ
Тайгазына баш болзын!
Койу сӱдин эмискен
Энезине баш болзын!
3. Канча ажу аш туруп,
Кудалап келдис, кыс сурап
Кудаларыс мында деп,
Чӧгӧдӧп келдис, кудалар
Камык кечӱ кеч туруп,
Суранып келдис, кудалар
Тӧрӧгӧндӧр мында деп,
Чӧгӧдӧп келдис, јурт сурап.
4. Кайыр туулар ажыра
Карчага тӱшти јем сурап,
Колыста тажуур тудунып,
Кудалап келдис, јурт сурап.
Бийик агаш бажынаҥ
Боро куш тӱшти, јем сурап.
Колыста тажуур тудунып,
Кудалап келдис, јурт сурап.
5. Ак кайыҥды кезеле,
Кабай эткен адазы.
Ак ла сӱдин эмизип
Азырап койгон энези.
Кӧк кайыҥды кезеле,
Кабай эткен адазы
Койу сӱдин эмизип
Чыдадып койгон энези.
6. Колыстагы чӧӧчӧйди
Алып ийзер, кудалар.
Кожоҥдоп берген чӧӧчӧйди
Амзап ийзер, кудалар.
Кожоҥдоп берген тажуурды
Тудуп ийзер, кудалар
Амадап келген бойысты
Аайлап ийзеер, кудалар.
7. Ак ла шајыҥ айагыс
Алтынга тӱҥей кӧрӱнгей.
Алып келген ол ажыс
Алама-шикир амзалгай.
Кӧк лӧ шајыҥ айагыс
Мӧҥӱнге тӱҥей кӧрӱнгей
Ичиндеги ол ажы
Мӧттӧҥ тату билдиргей.
8.Чӧӧчӧй туткан колыбыс
Чылай берди, кудалар.
Чӧгӧдӧгӧн тизебис
Арый берди, кудалар.
Тажуур туткан колыбыс
Тала берди, кудалар.
Эдиски болгон ӱнибис
Туна берди, кудалар.
9. Ак калайлу казанар
Бистиҥ отко кайнагай.
Ак шаҥкылу балагар
Бистиҥ јуртка јуртагай.
Кӧк калайлу казанар
Бистиҥ отко кайнагай.
Кӧк шаҥкылу балагар
Бистиҥ јуртка јуртагай.
10. Эрјинениҥ кулунын
Мал эдерис, кудалар
Энениҥ эрке балазын
Ал јӱрерис, кудалар
Ак бороныҥ кулунын
Ат эдерис, кудалар.
Аданыҥ эрке балазын
Ал јӱрерис, кудалар.
11. Јаламалу тажуурды
Тудуп ийзеер, кудалар
Јайнап айткан сӧзисти
Угуп ийзеер, кудалар.
Кыйра буулу тажуурды
Амзап ийзеер, кудалар
Кыйналып келген сӧзисти
Угуп ийзеер, кудалар.
12. Алаканда чӧӧчӧйим
Ак байталдыҥ сӱди эт.
Амадап келген бу јолым
Албаты јаҥдаган јаҥ эт.
Колымдагы ак ӱрӱс
Коҥыр байтал сӱди эт.
Кожоҥдоп келген амадуум
(Короты) јаҥдаган јаҥ эт.
13. Эрјинениҥ кымызын
Энези ичер учурлу
Эптӱ-јӧптӱ куучынды
Энези айдар учурлу.
Ак бороныҥ кымызын
Адазы амзаар учурлу.
Алкыш - јӧптӱ куучынды
Адазы айдар учурлу.
14. Эки ӱйелӱ чакыга
Эбирип тӱштис, тӧрӧгӧн.
Эне тушта јаҥ эмей
Јаҥдап јӱрӱс тӧрӧгӧн.
Алты ӱйелӱ чакыга
Айланып тӱштис, тӧрӧгӧн.
Ада тушта јаҥ эмей,
Јаҥдап келдис, тӧрӧгӧн.
15. Агаш бӱри јайылган
Айыл тудар ӧй келген.
Аданыҥ уулы чыдаган,
Айылду болор ӧй келген.
Эмил агаш јайылган,
Айыл тудар ӧй келген.
Энениҥ уулы чыдаган
Той эдетен ӧй келген.
16. Камык агаш ортодоҥ
Талдап кескен кайыҥыс.
Камык бала ортодоҥ
Кӧзис тийген балагыс.
Кӧп агаш ортодоҥ
Кӧрӱп кескен агажыс.
Кӧп лӧ балдар ортодоҥ
Кӧрӱп алган балабыс.
"Алтайдыҥ чолмоны" газет, 19.07.2016 ј.
Размещение присутствующих в аиле (юрта) родителей невесты
Присоединяйтесь к ОК, чтобы подписаться на группу и комментировать публикации.
Комментарии 1