У Дзісне па ініцыятыве грамадскай арганізацыі “Ахова птушак Бацькаўшчыны” на сцяне аднаго з двухпавярховых будынкаў па вуліцы Юбілейнай з’явіўся мурал, прысвечаны Язэпу Драздовічу. Разам з партрэтам легендарнага беларускага жывапісца – выява яго графічнай працы “Засценак Пунькі” (1922 г.). Засценак Пунькі, што на Глыбоччыне, вядомы як дом Я. Драздовіча, у якім ён нарадзіўся 13 кастрычніка 1888 года. Над ціхімі дахамі вясковых будынкаў – сіняя-сіняя ноч. Верхняя частка кампазіцыі сімвалічна адлюстроўвае “нябесныя бегі” – адзін з сюжэтаў драздовічскага космасу.
Аўтар манументальна-дэкаратыўнага роспісу – малады беларускі мастак Яўгеній Сасюра, работы якога ў стыле рэалізма і мадэрнізма прысутнічаюць на фасадах будынкаў у 20-ці гарадах нашай рэспублікі, сярод якіх Мінск, Магілёў, Гродна, Пінск, Гомель.
З’яўленне кампазіцыі, прысвечанай Язэпу Драздовічу, менавіта ў Дзісне не выпадковае. З нашым горадам знакамітага мастака звязвае некалькі выразных штрыхоў біяграфіі: ў 1906 годзе васемнаццацігадовым юнаком ён заканчвае тут школу (не гімназію); у сталым узросце, падарожнічае па гарадах і вёсках нашага краю, астаўляючы нам у спадчыну цыкл сваіх графічных работ пад агульнай назвай “Дзісеншчына”.
І сёння мы абавязаны знакамітаму земляку тым, што маем магчымасць убачыць родныя краявіды ў абліччы мінулага, супаставіць іх з цяперашнім часам. Творчы подзвіг жывапісца – антыпод сучаснаму прагматызму жыцця, прыклад самазабыўнай любові да Радзімы.
“Задыхаўся і слеп, бо тварыў апантана.
Я – Драздовіч Язэп, што маё захавана?”
– так пісаў, прымерваючы да сябе посах мастака-падарожніка глыбоцкі паэт А. Жыгуноў.
А захавана намі мастацкая спадчына глыбокага, удумлівага, чулага, заклапочанага лёсам радзімы чалавека. Захавана адчуванне еднасці з радзімай, непарыўнай сувязі з яе мінулым, гордасці за яе творцаў.
Легендарны мастак, славуты наш зямляк Язэп Драздовіч ўшаноўваецца ў Мінску, Заслаўе, Германавічах. Цяпер – і ў Дзісне.
А. Майсяёнак
Присоединяйтесь к ОК, чтобы посмотреть больше фото, видео и найти новых друзей.
Комментарии 18