Хьхьувай шану вин бакъар
Дяхтта чул бан ч1ун дакъар
Гьухъал к1унт1 неттабак1рай
Лишинсса мажал къашай
Мусил ххаят1ал ч1ант1ай
Арцул сир накьичнугу
Ц1у барз ливк симанналий
Гъили баргъ бур пар-пар т1ий
Ттеркьукьал ккарччал кьоькьри
Ххялт1а дурккун дунугу
Вил зуматусса махъру
Ттул дак1нин ниц1ал к1унт1ру
Ххуллурдайх муси ритай
Вил хъирив ща бивхьуну
Алжаннул балай баяй
Вил шаттирдал ч1униву
Ссав щалла ц1урттал дуц1ай
Вил симан пар увкуну
Баргъ ттуруллава личай
Вил мурччай пиш ккавккуну
Вил яруннав итаргуй
Ляълужавгьарду кюрттай
Ина дарц1ни ттул нинуй
Магьилул х1яви ххяххай
Агь утти ссут дурк1ссарив
Ссав лух1и-ц1ан ларгссарив
Банавша т1ут1ул ххуйшив
Лавсссарив мурчал ч1ап1ив
Лирч1уссарив ца къяртта
Цанна цурдалу дач1ра
Дарссарив чарин к1ура
Лух1и гьаттай бак1рац1сса
Утти инт дакъассарив
Мик1 къабассанниссарив
Чин къач1алач1и ттул макь
Неххайн к1ура дарссарив
Ттул аьзиз, ттул ххирай
Ттул ххаллил дадай
Цал ттигу оьвчакьай
Ттул ц1а учакьай
МОЬРШ ГЪАРАЛ
Ва гъаралгу мюрш дик1ав
Хъинну атил айривав
Дак1ния буккайривав
Гъарах мякьшиву т1ут1ив
Ва мурчалгу къоьяву
Чурххавун кьут1лат1аву
Аман ци тагьар дурвав
Ч1ируннат1ут1ал арив
Ва бургъилгу к1ияву
Хъинну ч1уч1ин айривав
Гьарай меж битайривав
Банавша т1ут1ул ч1ап1ив
Ва ххуллулгу ккуртташив
Дуламанттал ч1аьрушив
Агь та бялич1айривав
Ц1имилул макь рут1айвав
ХЪУРХЪ
Бюхттул зунттал дянив ххяллал зуманив
Цими азарда шин хьуривав лярхъун
Цими азарда шин хьуну дунугу
Мудангу жагьилсса жул шяравалуй
Аьзиз Хъурхъ, аьзиз Хъурхъ
Жул буттал улчай
Жун ниттихъал учай
Талих1рал балай
Кьабивтун инагу левххун лагару
Мина дакъа лачин чуллардайх кунма
Дак1ру хъама риртун хъирив буч1ару
Ятинну ливч1усса буттахъал кюрттайн
Аьзиз Хъурхъ, аьзиз Хъурхъ
Жул ч1аврил кьуллай
Лич1аннав мудан жу
Вия маькь лехлай
Аьрххилий нанини хъурхърал вирттаврал
Арх1ал ласайссари зунттал ххаллилшив
Аьрххилий нанини хъурхърал душварал
Арх1ал ласайссари няк1 ссавнил марц1шив
Аьзиз Хъурхъ, аьзиз Хъурхъ
Лич1аннав мудан
Вил зунттурду лахъну
Няк1 ссав чаннану.
ЗУНТТАЛ МАКЬ
Гъили баргъ вин аманат
Аманат чанна ц1уртти
Я Аллагь вин аманат
Ххира буттал билаят
Зунттурдув! Зунттурдув! Зунттурдув!
Зу Аьрщарал пахрурув!?
Марххалттув! Марххалттув! Марххалттув!
Зу барзунттал тажрурув!?
Щаращив! Щаращив! Щаращив!
Зу зунттурдал макьрурув!?
Хияллув! Хияллув! Хияллув!
Зу инсаннал хъарурув!?
Инсантал! Инсантал! Инсантал!
Зу Аьращарал ттарц1рурув!?
Ххуллурдув! Ххуллурдув! Ххуллурдув!
Я Аллагь зу чунмайрув?
Гьарца бюхттулшиврулу
Цанна-цаннасса ттарц1ру
Цумур ттурц1ал дуривав
Ва дуниял дургьуну
Чанна лавхъсса яруннал
Дак1нив лавхъсса чирахърал
Алжаннавун ххуллусса
Кьуранналул луттирал
Лакку буттал улттуву
Пахру-бюхттул зунттурду
Зул марххалттанул тажру
Ккаккай к1яла арцулну
Чаннашиву лиц1аву
Зунттал мукьал щаращал
Гьарца к1унт1лив пар т1аву
Чанна ц1укул сипатрал
Оьнгарал ч1у аьзизсса
Ц1у оьрму барачатсса
Нах1ушив лух1и т1ут1ул
Яруннал ттул ч1ивит1ул
Баргъгу барзгу ц1урттигу
Миннув парт1ий лавхъуну
Няк1сса ссавнил марц1шиву
Мудан мина дирхьуну
Къяртри, къяртри, дасттарду
Зунттал хъач1айх рат1авун
Жюрду,жюрду ххурххуртту
Щаращая мугьалттун
Къума рат1ув аьтарай
Лух1и лагав циракьай
Щинал марц1шив щаращай
Чув дакъа дав бусикьай!
Ххурххулул ч1у язухъсса
Щинна леххав т1ут1исса
Чарттай ци аьйри хьусса
Сситтуй миннуйх бишлайсса
Анаваршиву чунна
Чялих1сса щил хъиривра
Вав-шав т1ут1аву цира
Цу акъа хьунни т1ира!
ХХуллу бюхттул зунттайхсса
Аьрххи щюлли хьхьиринсса
Леххаву арсваврайнсса
Чуллардайх вайлул хьусса
Марц1шив щаращал щинал
Мудангу ттущал арх1ал
Вайннул лиц1ав вин ккаккан
Данниссар бургъил т1инттал
Бакъассари сси чарттайн
Чаннанна дихьлахьисса
Зунттаву оьрму бутлан
Чумартмири бусравсса
Да чаннаннил виричу
Чарбиту дак1нил заллу
Чури тти вил хияллу
Ссавруннайх бигьай хъару
Ц
Чуври нурданул чирахъ
Дак1нив ччаврил лавхъусса
Яруннаву ц1урттал пар
Ссав чаннал дуц1ин дайсса
Щалла ссавнил гьив юхсса
Так ца вин дурив хьхьарчун
Ва дунъяллий- гьартасса
Так ина къуц1ун авкьун
Тарив силий бишайсса
Бухар ссуник1ул кьяпа
Утти ссувссуну чуллу
Бурив хъили къабац1лай
Къаувхссара къуц1увун
Вах1шинувара усса
Къач1а хъус-кьинигу ттун
Бак1райх хьхьури лаххайсса
Чуллу ссувссусса кьяпа
Лавсун экьи личинна
Аьнт1ик1алулсса бувну
Къучи хьуну зананна
Зунзул чаннайн я щун бан
Хьхьунивх ххуллу ласунна
Чанна ц1урттач1ан гъан хьун
Бюхттул зунттуйн гьаз хьунна
Зунттул миц1ли авц1уну
Заннахь миннат ч1а чинна
Ххира буттал билаят
Т1ут1айх бичин ба чинна
НАГУ ВИЛ ЦА КЪЯРТТАРА.
Ахттабизул хъач1ниха
Ххяххя баргъ к1юрххил ч1ясса
Лак чаннал буц1ин байни
Нагу вил ца къярттара
К1юрххиц1ун зунзул чаннай
Арцул хьхьем хъунк1ул т1ут1ай
Бургъил т1инттал хъаттирдай
Зунттал миц1айх гьава бай
Гьаз хьунна бюхттул зунттуйн
Ябитан буттал улклуйн
Миц1муруллай кюрттайсса
Лакрал щархъайн аьзизсса
Зунттуч1агу зунттурду К1яла арцул бак1русса
Арнил ч1аравгу арду
ТТул дак1ниву майдансса
Гьарца чарих виричу
Чарбитул дак1 чумартсса
Щаращул бак1рац1 х1ави
Х1аллурдал увччу айсса
Шеърирдан ххявхсса улчай
Шяирнал ччаврил минай
Бургъил чаннав бавссусса
Чанна ц1укуй бюхттулсса
Зунчалату зунттайсса
Чаннайн к1унк1у т1ут1исса
ТТул дак1нив мархри щавшсса
Дараччи т1ут1и яргсса
Къакъунтту бур къакъалий
Ч1авасуну ч1авулий
Къукъухьигу къукъулий
Кьанчуллалу балайлий
Буттал улчай чайссия
Ххирашив бусайссия
Ч1аврил кьавкьун нанисса
Вихь щурщу бувайссия
Бачи жува гьаннуча
Лаарив бияннуча
Нак1лил щаращул щинал
Мякь леххан буваннуча
Гьаз хьунну мит1аарив
Щюлли арив кьаарив
Оьрч1ни т1урк1урдал арив
Ч1ируннат1ут1ал арив
Нани цач1ун хьуннуча
Х1аллих бярнил бартнихун
Оьвчаву дуваннуча
Дустал бат1ай дуссухун
Лехханну гьава банну
Х1аллил хъач1айн гьаз хьунну
Бассанну экьи гьанну
Ттарлил кьункьал щат1аву
Оьрч1и т1ут1ал ясирсса
Жигъер ххуллих тяхъасса
Тти аьрххи хъуннеххайнсса
Мусил балугъ пяч1ах1сса
Баргъ т1инттай пар лавхъусса
Жиндрал нех мина дурсса
Ува нагу вилла дус
Х1ави т1иму мусилсса
Няк1 ссав кьурттай дургьусса
Барзунттал пяч1ах1 барххуй
Баргъ хъаттирдал бащайсса
Ссавруннал пяч1ах1 барзуй
Утти нагу зул дусра
Авну барзунттайх занан
Гьавасрал хъару ххярххун
Ссавруннайх гьава буллан
Къакъунтту бур къакъалий
Ч1авасуну ч1авулий
Къукъухьигу къукъулий
Кьанчуллалу балайлий
Буттал улчай чайссия
Ххирашив бусайссия
Ччаврил кьавкьун нанисса
Вихь щурщу бувайссия
Нани жува гьаннуча
Лаккуйн буттал шяравун
Чант1 учин буваннуча
Дак1нив ч1аврил асарду!
Бургъил т1инттал зана дай
Щаращал щин зунттавннай
Ликку гъили баргъ жуйгу
Зана ба жу лаккуйнмай
К!ИНИ
Хъат1ри бури т1ий хъар-хъар
Ттуй хъару дакъари т1ар
Щюлли хьхьири ххурххулий
Ттун гьузун кьак1улли т1ий
Марч хьхьич1а укьан уллай
Барргъ ххютулун на акьлай
Лагмара гьарза чявшлий
Да гьунар бакъуй чавш т1ий
Так ца к1ини бур мудан
Цан учара т1ий аман
Хъит уча т1ар хьхьич1унмай
Талих1 бурча ялугьлай
АСАРДУ
Циваннукьай жува
Тур дурккунмасса
Циванну цаннайн-ца
Эц1 бивк1унмасса
Циванни ттул яру
Мудан луглайсса
Ххуймунив гьарцагу
Ина ккаклайсса
Вил хьхьич1ун никкирттайн
Агьан х1адурсса
Ияйхтурив вич1ан
К1ура аллайсса
Ттул дак1 ясир дурну
Ина дунура
Цира на вияту
Ларитлатисса
КЪУКЪУ
ХЬХЬИ
Левххуну бувк1унни
К1яла къукъу хьхьи
Къукъу дурцун бури
Ттул хьхьич1ух занай
Иминшив бущилул
Наьх1у къукъулул
Ура на ялугьлай
Я буцан къашай
Ура ттухьхьва нава
Сикъавсун ц1ухлай
Ххуйшиврий хьхьич1ухсса
Тамаша буллай
Дуванавав мина
Къукъу хьхьи ина
Ттул ч1арав кюрттарав
Ччаврил ардарав
Леххайвав юхссагу
На х1айран увну
Ттул дак1нив ца ттигу
Оьттул щав дурну
ЛАМЛАМНАХЬ
Барх1 булайхту х1апгу т1ий
Шярал ккаччи хъирив шай
К1ура авну гьужум ба
Магъ карч1авн лаьк1инт1иссар
Зурч1ай т1ий бувну мазгу
Бущинт1иссар вил ччанну
ХХИРАР ТТУН
Ххирар ттун зунттурду
Рат1ру ва арду
Ина ша бизайсса
Жигъир ххуллурду
Ххирар щюлли къурув
Марщай чалагъай
Вил кьункьал аьнт дурсса
Т1ут1ив ццаццуйсса
Ххирар ттун вил яру
Гьузун миннуву
Ч1ан дакъа хьхьириву
Бат хьун оьвкьуну
Ххирар арцул хъазам
Хъазамрав ч1юйн бан
Вил мусил ххаят1айх
Ттюнгъану ках т1ун
Нах1ури мурччив вил
Ц1уп1 т1ун нац1усса
Т1ааьншив зурзулул
Чурххайх щат1айсса
Х1айран к1ива чинар
Цач1у ххявххусса
Аавхъун уруглан
Ччаннах авурсса
Лах1лай хъюлчай т1исса
К1яла гьилул мурхь
Так ца вил ххютулу
Рах1ат шай ттул чурх
ХЬУЛ
Ссятрал т1инттал хьхьич1 даркьун
Ч1ун най дури дакъарц1ун
Экьи най дури щинну
Цаннил хъирив ца шинну
Дури дуниял гьанай
Лагмава оьрму щарай
Я ляп1чин мугьлат бакъа
Даххана хъанай гьарза
Вана дурк1ун щюлли инт
Щюлли т1уллал т1ут1ал инт
Гъи ссут к1и ялагу инт
Ссахрив буру ялугьлай
К1юрх-оьрч1шиву ларгуну
Буру бугьара хьуну
Вагу мак1ну ляркъуну
Кьус бивк1уну аьсавну
Так ца хьул бур мудансса
Гьич баххана къашайсса
Мак1ри ч1ихьри къакуну
Таьлигьрайн к1унк1у т1исса
ЦУ ХХАРИ УВАНЬЯВАВ
Ххуй душнихь ч1аву дач1лай
Уттара дару хьхьурду
Цаннах ца ч1аврил ччучлай
Най бури щала оьрму
Цу ххари уваньявав
Ттух зунххи бурувгусса
Чун анаварнуявав
Ттул ч1арах бувккун лавгсса
Ях1
Лакрал буссар ца махъ буссар
Цинна ц1агу ях1 учайссар
Ях1 буманан хъинну к1улссар
Мунил мяъна курт1сса дуссар
Чарил ях1лил къала ц1акьссар
Чувнал ях1лил му ябайссар
Ях1 буманал дак1 чумартссар
Буттал к1анттух жан къамяшссар
Бачи дустал ях1 буванну
Буттал к1ану бюхттул бувну
Ниттил мазрал къала банну
Ликъакьаьйсса ликъаяйсса
Ниттил ччаннац1 алжаннунсса
Ххуллу ц1акьну ябуллайсса
Ч1УН
Ч1ун х1акин дакъар
Хъин къаанниссар
Щаву гьанниссар
Аьш лич1анниссар
Ч1ун иник1ук1ур
Оьрму к1ук1лаайсса
Цал-цал вил дак1гу
К1урч1лу дуллайсса
Ч1умул ххуллул лах
Марц1 буванниссар
Дак1нивату лагъ
Уккан анниссар
Ч1умул буванниссар
Вил яру т1ит1ин
Ч1алач1и анниссар
Х1акьма хъач1 хьхьачин
Ч1ун аькьлукарди
Му мубаракри
Ц1акьсса дарзири
Гьарнан кьадири
Ч1ун му къучагъри
Х1уч1 къаучайсса
Х1акьсса вил дусри
Ник къарищайсса
Дач1расса лишан
Ч1явури аькьлукартал
Винсса маслих1атчитал
Дурну аьт1ут1и лажин
Дак1 вивх ц1иц1лан усттартал
Так къак1улссари миннан
Вил дак1нил курт1мур к1алан
Ина рут1лат1и мукьан
Анжагъ ца бушив чаран
Аьнтну нузру ц1акь дуван
Дак1нил х1ужлурдавунсса
Бувч1ин дак1 ц1уц1и мишан
Душив дач1расса лишан
.....
Лахъ ц1укуну пар уку
Лачинну ссавнин гьаз хьу
Къюк1 къаан ришлай хъатру
Дуруччи вич1ив ц1акьну
Зунттай занчну мик1 лач1у
Рат1нил курт1нивун агьу
Ц1ан къатлув лух1и ччиту
Щялмахъссар. Малугларду.
.....
МОЬРШ ГЪАРАЛ
Ва гъаралгу мюрш дик1ав
Хъинну атил айривав
Дак1ния буккайривав
Гъарах мякьшиву т1ут1ив
Ва мурчалгу къоьяву
Чурххавун кьут1лат1аву
Аман ци тагьар дурвав
Ч1ирунна т1ут1ал арив
Ва бургъилгу к1ияву
Хъинну ч1уч1ин айривав
Гьарай меж битайривав
Банавша т1ут1ал ч1ап1ив
Ва ххуллулгу ккуртташив
Дуламанттал ч1аьрушив
Агь бя та лич1айривав
Ц1имилул макь рут1айвав
.....
Чун анаварнуявав
Ттул ч1арах бувккун лавгсса
Цу ххари уванъявав
Ттух зунххи бурувгусса
.....
Ххуй душнихь ч1аву дач1лай
Уттара дару хьхьурду
Вихсса ч1аврил на ч1учлай
Най бури тти ттул оьрму
.....
К1и буран дяркъу
К1яла марххала
Малугларда т1ут1ах
Му замгьарданув
.....
Бивну зурч1айт1ий
Ахъув мурхьхьирай
Гьивч бикъаттурча
Багьну аьяйвав
.....
Нажагь мякьну ухьурчан
Бугьа ххуллу щаращуйн
Хъач1раяту ххуй душнил
Арцул вяракъи ликкан
.....
Дуснан к1улну бик1ай
Вия бусанмур
Винмагу къак1улсса
Виясса ххуймур
НАНУ ЩЯБИК1У Ч1АРАВ.
Нану щябик1у ч1арав
Диша бак1 ттул хъазамрав
Бухху,мина да дак1нив
Кюру ба къюк1лил ч1арав
Нану щябик1у ттуч1а
Диша вич1и ттул къюк1лий
Дукки, ласи, вилла да
Вилламунин кьурван да
Нану ч1арав щябик1у
Ттун гьар вил бач1васса ссих1
Виятусса пикрирду
Миннул дуллусса дардру
Ласи ттул къюк1гу ласи
Ласи яруннал чани
Ласи аькьлу, ттул к1улши
Хияллу ва шугълурду
Так ца бур ттул вихь миннат
Макьукьара ттул кьисмат-
Бити, мабара лещан
Ттул дак1нив ч1аврил буран
КЪАБАЯЙ.
Ттуккул гьаълил ч1униву
Балайлул ч1у къабаяй
Къоьк1манан
Шагьрулул къутай ивтун
Зунттал къу-аьс къабаяй
Къоьк1манан
Щюлли хьхьирил ххурххулув
Щаращал жоьр къабаяй
Къюк1манан
Бургъил т1инттал чаннаву
Чанна ц1уртти ххал къашай
Мурч1инан
Ришлашисса хъатраву
Угьлилмур ч1у къабаяй
Къартманан.
Усттар
Ца ххуйрича вяракъи
Валлагь га арцул бури
Душнил хъарай исвагьи
Улу хьурча ябат1и
Га к1яла бувну бури
Усттарнал кару-муси
Вил гьунар тамашари
Хъурхъиричу-къалайчи
Ттюркьукьал ккарччив дури
Валлагь магьилул парт1ий
Вил кару ц1уллу дивуй
Да усттар- хъурхъиричу
Ч1явур гьунарду хъурхърал
Дак1ру дури уздансса
Бачи хъамалу дустал
Мажлисрахун мяйжансса
.....
Присоединяйтесь к ОК, чтобы посмотреть больше фото, видео и найти новых друзей.
Нет комментариев