Предыдущая публикация
Акафист священномученику Илариону (Троицкому), архиепископу Верейскому память 4 июля
Кондак 1
Воине Христов и богослове изящнейший, Едину Святую, Соборную и Апостольскую Церковь во спасение всех исповедавый, за нюже страдати даже до смерти изволил еси, и ныне в церкви торжествующих прославляемый, поминай нас, любовию ти взывающих:
Радуйся, Иларионе, Церкве Русския славо и утверждение. (или иной припев:
Радуйся, Иларионе, славо и красото церковная).
Икос 1
Ангела земнаго и человека небеснаго зрим тя, святителю Иларионе, чистоту душевную измлада соблюдшаго и подвигом духовным дар благодати стяжавшаго, во еже скорую помощь всем подавати, в молитвах тя призывающим:
Радуйся, благочестие родителей унаследивый;
радуйся, церкве Христовы избранное чадо.
Радуйся, от младенчества учению прилежавый;
радуйся, истины умом и сердцем взыскавый.
Радуйся, школу духовную яко матерь и питательницу возлюбивый;
радуйся, не млеком точию, но и твердою пищею богословия воспитанный.
Радуйся, под кровом молитв преподобнаго Сергия верою укрепивыйся;
радуйся, на брань с миродержителем тьмы века сего в силе духа изшедый.
Радуйся, Иларионе, Церкве Русския славо и утверждение.
Кондак 2
Видя праздно патриаршее место в великой церкви Успенстей, рыдал еси сердцем горце, Иларионе, и к людем русским взывал еси: доколе плакати имать земля? Избранну же патриарху освященным собором, ликуя воспел еси Богу победную песнь: Аллилуиа.
Икос 2
Разумом богопросвященным прорекл еси патриарху не царский венец восхитити, но мученическим венцем украситися, по вся бо дни умирати имать за церковь Христову. Ты же, Иларионе, крестным путем первосвятителю сшествовал еси, сего ради тя восхваляем:
Радуйся, догматов и канонов церковных ревнителю;
радуйся, о церкви русстей теплый молитвенниче.
Радуйся, поругания славы церковныя видети не терпевый;
радуйся, словом огненосным сердца верных воспламенивый.
Радуйся, новоизбраннаго патриарха во исполнение чаяния своего узревый;
радуйся, тому в трудех и попечениих о церкви соработниче.
Радуйся, крест служения архиерейскаго во дни гонений восприявый;
радуйся, на камени веры стопы твоя утвердивый.
Радуйся, Иларионе, Церкве Русския славо и утверждение.
Кондак 3
Силою вышняго укрепляем, Иларионе, изшел еси на подвиг служения архиерейскаго, всем быв вся, и всем себе поработив, утешая, наставляя и обличая, Богу же выну поя: Аллилуиа.
Икос 3
Имея ревность по Бозе и велие дерзновение, святителю Иларионе, отступники отгнал еси от обители Сретенския, к покаянию тех призывая и чада церковная во благочестии утверждая, темже приими от нас похвалы сия:
Радуйся, враги твоя и гонители незлобием покрываяяй;
радуйся, враги церковныя огненными словесы опаляяй.
Радуйся, хитросплетения лжепастырей беззаконных расторгаяй;
радуйся, в верности патриарху колеблемых утверждаяй.
Радуйся, многи отступники к покаянию обративый;
радуйся, любовию к церкви верных сердца исполнивый.
Радуйся, лукавыя совопросники века сего посрамивый;
радуйся, за истину церковную страдати изволивый.
Радуйся, Иларионе, Церкве Русския славо и утверждение.
Кондак 4
Бурею злобы смущаеми гонители церкве, узы и темницы ти уготоваша, тщащееся свет исповедания твоего сокрыти, Иларионе, ты же и власть богоборную яко попущение за грехи от Бога приемля, о всем прославлял еси Промыслителя всех, поя: Аллилуиа.
Икос 4
Слыша страшныя вести о гонениих лютых, не поколебался еси душею, Иларионе славне, но паче верою в церковь Христову укрепился еси, яко багряницею и виссом, кровьми новых мученик украшаему, от них же единаго тя, священномучениче, ублажаем:
Радуйся, омофор святительский в праздник священномученика Ермогена приемый;
радуйся, служение архипастырское страданием запечатлевый.
Радуйся, во узах, темницах и тяжких работах Христа ради заключаемый;
радуйся, благодушием и терпением в скорбех сих украшаемый.
Радуйся, нестяжания и кротости образе;
радуйся, о гонящих и обидящих тя молитвенниче.
Радуйся, богослов сый, рыбарския мрежи ввергати не возгнушавыйся;
радуйся, уму преизящному апостольскую простоту сочетавый.
Радуйся, Иларионе, Церкве Русския славо и утверждение.
Кондак 5
Боготечная звезда явился еси, Иларионе, во узах соловецких страждущим люте, имже смерть предстояше на всяк час, тьму бо злобы сатанинския светом любве просветил еси, уныние и страх отгоняя, соузники твоя научил еси хвалити Бога о всем: Аллилуиа.
Икос 5
Видяще начальницы и приставницы во узилищи мужество и доброту души твоея, Иларионе чудне, дерзость обычную отлагаху и неволею тя яко архиерея Божия почитаху, мы же тя яко святителя и мученика сице восхваляем:
Радуйся, простотою и кротостию вся к себе привлекаяй;
радуйся, любовию твоею всякую душу возвеселяяй.
Радуйся, тщеславнаго духа фарисейскаго обличителю;
радуйся, лицемерия и лжи искоренителю.
Радуйся, образе Божий нетленный в человецех прозреваяй;
радуйся, и самых отчаянных грешников не отметаяйся.
Радуйся, благодушием твоим соузники утешаяй;
радуйся, словом веры исполненным, малодушныя возставляяй.
Радуйся, Иларионе, Церкве Русския славо и утверждение.
Кондак 6
Проповедник и свидетель истины слова Христова явился еси, яко врата адова церкви не одолеют, вся бо суетная коварства князей богоборных, Иларионе, явны соделал еси, просвещающему и укрепляющему тя Богу взывая: Аллилуиа.
Икос 6
Возсиял еси Церкве Русской, Иларионе, посреде смятений и расколов, от слуг сатанинских всеваемых, ты бо догматы и каноны церковныя твердо храня, предателем и отступником не сочетался еси, паче же страдати с людьми Божиими изволил еси, темже тя, священномучениче, похваляем:
Радуйся, лести богоборных не преклонивыйся;
радуйся, хитросплетенныя козни тех разоривый.
Радуйся, истину церковнцю словом богомудрым проповедуяй;
радуйся, страдальческим житием слово сие изветствуяй.
Радуйся, архипастырей и пастырей, во узах томимых, укрепляяй;
радуйся, от раскола церковнаго смущенных ограждаяй.
Радуйся, к единению и послушанию церкви вся призываяй;
радуйся, отпадших заблуждение обличаяй.
Радуйся, Иларионе, Церкве Русския славо и утверждение.
Кондак 7
Хотящу ти церкви Христове послужити, Иларионе, прият Человеколюбец господь страдальческое твое житие яко жертву благоуханну, ходатая и молитвенника тя верным дарова, вопиющим: Аллилуиа.
Икос 7
Новым страстотерпцем российским сочетался еси, Иларионе достоблаженне, егда во врачебнице Петрова града тяжко боляй, душу твою в руце Христу предал еси. Вернии же многострадальное тело твое погребоша с плачем, надгробныя песни ти воспевающе:
Радуйся, от уз и заточения смертию разрешивыйся;
радуйся, свободу славы чад Божиих улучивый.
Радуйся, на земли не о себе, но о Церкви Русстей сердцем скорбевый;
радуйся, на небеси о благостоянии ея присный ходатаю.
Радуйся, верными с любовию провождаемый;
радуйся, ангельским лики во славе сретаемый.
Радуйся, в блаженствах евангельских Христу последовавый;
радуйся яко мзда твоя многа на небесех.
Радуйся, Иларионе, Церкве Русския славо и утверждение.
Кондак 8
Странен и пришлец был еси на земли, Небеснаго Царства взыскуя, образ того и явление церковь святую в мире сем исповедуя, и тайну спасения богодвижным умом испытуя, богословствовал и хвалил еси бога о сем: Аллилуиа.
Икос 8
Весь ум твой вперив к небесным, Иларионе, истины Христовы взыскав, обрел ю еси и богомудрым словом твоим проповедал еси. Мы же учением твоим просвещаеми, благодарно зовем:
Радуйся, благочестие богословию сочетавый;
радуйся, сердце чисто к уразумению того стяжавый.
Радуйся, мертвых учений еретических супротивниче;
радуйся, живых словес отеческих проповедниче.
Радуйся, Христа краеугольна каменя церкве исповедавый;
радуйся, на камени сем упование твое утвердивый.
Радуйся, умы любомудрыя богословием просвещаяй;
радуйся, сердца простая теплотою любве возгреваяй.
Радуйся, Иларионе, Церкве Русския славо и утверждение.
Кондак 9
Все естество ангельское радости исполнися, Иларионе великоимените, восходящу ти от земных к небесным, ты бо яко новая звезда на тверди церковней возсиял еси верным, поющим о тебе Богу: Аллилуиа.
Икос 9
Ветия суемудренныя видим тобою посрамлены, Иларионе, латинская бо и люторская мудрования яко чуждая церкви низложил еси, нас же во православии утвердил еси, зовущих ти:
Радуйся, апостольских словес провозвестниче;
радуйся отеческих писаний сказателю.
Радуйся, о спасении человеков с церковию мудрствуяй;
радуйся, падших возсоздание и совершение во Христе проповедуяй.
Радуйся, латинская лжеучения о выкупе и заслугах отринувый;
радуйся, обычаи чужеземныя церкви противныя обличивый.
Радуйся, грех противу церкве яко велию язву в русстей земли прозреваяй;
радуйся, заблудшия к покаянию призываяй.
Радуйся, Иларионе, Церкве Русския славо и утверждение.
Кондак 10
Спасти хотя душу, плоти, миру и диаволу не поработился еси, Иларионе блаженне, но яко злато в горниле, скорбьми многими искушаем, терпением разум совершен стяжал еси, радуяся о Бозе и поя Ему: Аллилуиа.
Икос 10
Стена и утверждение Церкви Русстей во дни безбожных гонений явился еси, Иларионе святителю, темже и нас, в мори житейстем обуреваемых, от лжеучений и соблазнов избави, вопию щих ти с любовию таковая:
Радуйся, церковь яко матерь спасаемых от юности возлюбивый;
радуйся, словом и молитвою многи в лоно ея возвративый.
Радуйся, плоть твою воздержанием духу покоривый;
радуйся, ум твой учением церковным уцеломудривый.
Радуйся, благочестия цвете нетленный;
радуйся, богословия плод приносяй.
Радуйся, святителей русских удобрение;
радуйся, новомучеников честная похвало.
Радуйся, Иларионе, Церкве Русския славо и утверждение.
Кондак 11
Пение всеумиленнре приносим ти, Иларионе, отче наш, к раце мощей твоих любовию притекающе и молящеся: не остави отечества твоего земнаго и обители твоея, но вся во благочестии утверди, да выну зовем: Аллилуиа.
Икос 11
Светозарную звезду в нощи уныния сущим видим тя, Иларионе небоявленне, ты бо свет невечерния радости в сердце нося, скорбный мрак разгоняеши, возвеселяя всех вопиющих ти:
Радуйся, радости тезоименитый;
радуйся, от младенства Богом избранный.
Радуйся, блаженныя чистоты сопричастниче;
радуйся, пасхальныя радости провозвестниче.
Радуйся, славу царствия в дольнем мире являяй;
радуйся, радости о Бозе Спасе падшия научаяй.
Радуйся, яко житие твое присное есть Богу хваление;
радуйся, яко смерть твоя Христу Воскресшему победное пение.
Радуйся, Иларионе, Церкве Русския славо и утверждение.
Кондак 12
Благодать от Бога приял еси, Иларионе, недужныя исцеляти, скорбныя утешати, падшия возставляти, темже и мы, светло память твою совершающе, благодарно зовем: Аллилуиа.
Икос 12
Поюще подвиг исповедания твоего, восхваляем тя, святителю Иларионе преславне, течение бо непорочно скончав и веру соблюд, правды венец приял еси, темже Церковь Русская тобою хвалится, победныя песни ти возсылающи:
Радуйся, воине Христов непобедимый;
радуйся, церкве столпе несокрушимый.
Радуйся, заповедей евангельских исполнителю;
радуйся, нивы церковныя делателюи хранителю.
Радуйся, цвете российскаго луга духоваго;
радуйся, плоде красный сеяния спасительнаго.
Радуйся, в соборе новых мучеников возсиявый;
радуйся, о земнем отечестве твоем присный молитвенниче.
Радуйся, Иларионе, Церкве Русския славо и утверждение.
Кондак 13
О предивный священномучениче Христов Илларионе, Церкве Русския украшение, приими ныне малое моление сие наше, и от тлетворных соблазнов избави нас, и от вечных мук свободи твоими к Богу молитвами, да спасение улучивше, воспоем с тобою Святей Троице: Аллилуиа.
Сей кондак глаголи трижды, и паки икос 1 и кондак 1
Икос 1
Ангела земнаго и человека небеснаго зрим тя, святителю Иларионе, чистоту душевную измлада соблюдшаго и подвигом духовным дар благодати стяжавшаго, во еже скорую помощь всем подавати, в молитвах тя призывающим:
Радуйся, благочестие родителей унаследивый;
радуйся, церкве Христовы избранное чадо.
Радуйся, от младенчества учению прилежавый;
радуйся, истины умом и сердцем взыскавый.
Радуйся, школу духовную яко матерь и питательницу возлюбивый;
радуйся, не млеком точию, но и твердою пищею богословия воспитанный.
Радуйся, под кровом молитв преподобного Сергия верою укрепивыйся;
радуйся, на брань с миродержителем тьмы века сего в силе духа изсшедый.
Радуйся, Иларионе, Церкве Русския славо и утверждение.
Кондак 1
Воине Христов и богослове изящный, Едину Святую, Соборную и Апостольскую Церковь во спасение всех исповедавый, за нюже страдати даже до смерти изволил еси, и ныне в церкви торжествующих прославляемый, поминай нас, любовию ти взывающих:
Радуйся, Иларионе, Церкве Русския славо и утверждение.
Молитва
О преславный угодниче Божий священномученниче Иларионе, отче наш, ты во дни маловременного жития земнаго посреде гонений и скорбей многих веру сохранив, духа не угасил еси и верныя научил еси, како подобает в дому Божии жити, яже есть церковь Бога жива, столп и утверждение истины. Сего ради к тебе припадающе молимся: помози нам твоими молитвами догматы и каноны церковныя твердо хранити, зрение согрешений своих духом смиренным стяжати, всякаго человека яко нетленный образ Христов по глаголу евангельскому возлюбити, ниединаго же презирающе или отревающе, но всем по силе служаще, и тако Господеви работающе, да сподобимся с тобою и со всеми новомученики российскими воспевати Святую Троицу во веки веков. Аминь.
Молитва иная, составлена в Соловецком монастыре
О великий угодниче Божий и преславный чудотворче, святителю Иларионе! От дальних и ближних градов и весей сошедшеся, во еже на месте подвигов твоих помолитися и многоцелебныя мощи твоя облобызати, из глубины сердца взываем к тебе: жезлом благости, якоже пастырь добрый, упаси заблуждшыя овцы стада Христова, во дворы Господни сия всели, огради нас от соблазна, ересей и расколов, научи во странствии суших горняя мудрствовати: разсеянный ум наш просвети и на путь истины направи, охладевшее сердце согрей любовию ко ближнему и ревностию ко исполнению велений Божиих, грехом и нерадением ослабленную волю нашу оживотвори благодатию Духа Всесвятаго: да твоему пастырскому гласу последующе, сохраним в чистоте и правде души наша, и тако, Богу помогающу, Небеснаго Царствия достигнем, идеже купно с тобою воспрославим пречестное и великолепое имя Отца и Сына и Духа Святаго во веки веков. Аминь.
Тропарь, глас 4:
Святителю Христов Иларионе,/ славо и похвало Церкве Русския,/ разум божественный стяжав,/ пред безбожники Христа дерзновенно исповедал еси,/ Егоже ради страдания претерпевая,/ людем верным возглашал еси:/ без Церкве несть спасения.
Тропaрь, глас 4-й
Воине Христов Иларионе, славо и похвало Церкве Русския, пред гибнущим миром Христа исповедал еси, кровми твоими Церковь утвердися, разум Божественный стяжал еси, людем верным возглашаше: без Церкве несть спасения.
Кондак, глас 2:
Славу мира сего оставив, Христу доблественне последовал еси и, святительское служение восприим, венцем мученичества украсился еси, и ныне, Престолу Божию предстоя, молися, Иларионе, иерарше премудре, спастися душам нашим.
Кондак, глас 6
Иларионе, священномучениче Христов, служителей грядущаго антихриста не убоялся еси, Христа мужески исповедал еси, за Церковь Божию живот твой положи, красо новомученик Российских, Руси Святыя похвало, ты Церкве нашея слава и утверждение.
Величание:
Величаем тя, священномучениче Иларионе, и чтим честная страдания твоя, яже за Христа претерпел еси.
Следующая публикация
Нет комментариев