Ибрат.
(Хамма эркаклар ўқисин).
Эркакнинг қарздорлиги деган гап кимларгадир балки ёқмас.
Аёлингизга беписанд қарамангиз. Гуллаб турган бодом навдасидай бир аёлнинг эшигингиздан бош эгиб кириб, кўзингизга жавдираб, ҳаёт-мамотини сизга бағишлаб, қаттиқ остонангизга бош қўйиб яшай бошлашининг ўзи сизни кўкларга кўтармайдими?!
Чунки ўзининг неларнидир қумсаётган кўнглини ерларга кўмиб қўйиб, сизга-ю, ота-онангизга ёқадиган таомни пишираётган аёлдир.
У ўз ҳузурини йўқотиб, сизга ҳузур бераётир. Сизнинг бу хурсандлигингиздан Яратган ҳам хурсанд. Аммо Аллоҳнинг бандасини рози қилиш сизнинг ҳам елкангиздаги юк! Сиз ҳам аёлингизни меҳнатларига яраша хушнуд қилишни ҳар гал юрагингизга тугиб қўйинг.
Яратганнинг неъмати бўлмиш фарзанд онанинг ҳамма аъзосидан узиб-юлиб олиниб, бола шаклига кирган вужуддир. Айтишларича, сут оқ рангдаги “қон” экан, демакки бола туғилган заҳоти онасининг қонини сўришга тушади. Болани вояга етказиш деган жанггоҳ ҳар бир онадан ўзини қурбонликка тортишни сўрайди. Шунча жафо билан эришилаётган фарзанд эса, “фалончизода” деб сизнинг номингиз билан аталади. Аёл сизнинг палагингизни кўпайтираман деб вайронага айланади, хуснини йўқотади. У сизнинг номингизни ўчирмаслик учун жонидан кечишга тайёр турди. Бу фидойи жон камчилиги ошиб-тошиб кетганда ҳам минг эмас, миллион ҳарматга лойиқ эмасми?
Аёлингизни аёллик ҳурматини жойига қўйинг, Аллоҳ розилиги учун ҳам асранг аёлни. Уни тани-сиҳатлигини ўйламаган кунларингизни қаро деб номланг. Аёлингизни тўлмай турган кўнгли ва оғриб турган жонини тинглай билинг.
Эркакдан ҳурмат сўралиши аёлнинг баҳосини ошириш ёки унинг “заифа” аталгани учун кўнглини кўтариш маъносида эмас, балки эркакнинг ундан қарзлари беҳад кўплиги учундир. Эркакка рўбарў бўлганидан бошлаб, аёл босган ҳар 3 қадамнинг 2 таси азият бор. Аммо миннат қилмайди, фиғон чекмайди. Ҳатто ўзининг ҳурмат қилинишини сўрамайди.
Ҳурмат кўргудай бўлса, ҳайрат ва ҳаяжон билан мукофот тарзида қаршилайди. Ўзини бу даражага муносиб кўрмай, баъзан хижолат ҳам чекиб қўяди. Унинг шу туришининг ўзи буюклик эмасси?!
Аёл сизга ёқмаган алфозда ҳам қозонингизни жазиллатиб, чироғингизни ёқиб, ҳомиладор ҳолатида ҳам ўшандай тиними йўқ юраверади.
Ичидаги боласи унинг ўпка ва жигарига чирмовиқдай ёпишиб, бағридаги бор мағзини шимиб турса ҳам оёқлари шишиб, уйқусизликка дучор бўлиб, бели узилай деса ҳам тиним билмайди, оиласининг хизматини қилаверади. Сизнингча, ҳурмат унга бўлмай, кимга бўлсин. Бекорга “Кўзи ёрийди” дейилмайди.
Чунки фарзанд кўриш жараёнида аёл “ё ҳаёт, ё мамот” деб турган кўприкдан ўтади. Кўзи ёрир экан, аёл суяклари қирсиллаб сурилади, этлари узилади. Бу дард фақат Аллоҳга аён.
Жони кўз косасидан чиқай деб турса- да, “жон доктор, нима қилсангиз ҳам боламни тирик олинг” дея фарёд уради.
Ўзи нима бўлишини ўйламайди ҳам...
Ўзинг жуфт яратдинг, жуфт юрсин доим,
Бир-бирин десинлар қуёшим ойим.
Дилдаги ўтинчим, тингла Худойим,
Эркак ҳам аёл ҳам ёлғиз қолмасин...
Майли соч оқарсин, киприк қошгача,
Айирма ҳеч йўғи тўқсон ёшгача,
Барибир покиза турмуш бошқача,
Эркак ҳам аёл ҳам ёлғиз қолмасин...
Айрилиқ, дилларга ғам-қайғу солар,
Меҳр ва оқибат буткул йўқолар,
Фарзандлар кўзлари жавдираб қолар,
Эркак ҳам аёл ҳам ёлғиз қолмасин...
Эй Аллоҳ, йўл кўрсат, қалбларимиз оч,
Яхшилик диёнат уруғуни соч,
Эркаксан, аёлсан жоҳилликдан қоч,
Эркак ҳам аёл ҳам ёлғиз қолмасин...
Ёлғизлик – қаритиб эрта сўлдирар,
Ёлғизлик – дилларни дардга тўлдирар,
Ёлғизлик – инсонни эрта ўлдирар,
Эркак ҳам аёл ҳам ёлғиз қолмасин...
Присоединяйтесь к ОК, чтобы посмотреть больше фото, видео и найти новых друзей.
Комментарии 5