Татарские плейкасты

Кеше нинди хәлдә үлә, шул хәлендә терелтеләчәк

Бер ир [хаҗ мәлендә] Гәрәфәттә торганда дөясеннән егылып төшеп, муены сынып үлә. Һәм Пәйгәмбәр ﷺ:
"Аны лотослы су белән юып, ике тукыма кисәге белән кәфенләгез. Әммә миск сөртмәгез һәм башын капламагыз*. Чөнки Кыямәт көнендә ул тәлбия** әйткән килеш терелтеләчәк", – ди.
әл-Бохари, "Сахих" (1268), Мөслим, "Сахих" (1206).
* Чөнки хаҗ кылган вакытта (ихрам хәлендә) хушбуй-миск сөртенергә дә, башны капларга да ярамый.
** Тәлбия – хаҗ һәм гөмрә вакытында әйтелгән махсус зикер сүзләре.
~~~~~~~~~~~~~~~~~~~~~
Икенче бер хәдисендә исә Пәйгәмбәребез ﷺ шулай дигән:
"Аллаһның һәр колы нәрсәдә үлгән, шул нәрсәдә терелтеләчәк".
Мөслим, "Сахих" (2878).
Ягъни, кемдер ихрам хәлендә, тәлбия әйтеп үлсә, Кыямәт көнендә дә тәлбия әйткән килеш тергезелер. Намаз укып торганында җан бирсә, намазында терелтеләчәк. Әгәр соңгы сулышы Коръән укып утырганында йә дәрес алырга дип мәчеткә китеп барганында булса, Аллаһ Тәгәлә уны шул гамәлендә терелтәчәк. Ураза тоткан чагында үлеп калучы уразалы килеш Аллаһ алдына басыр, һәм ифтары да аның Ахирәттә булачак, ин шәә Аллаһ.
Һәм киресенчә дә шулай ук. Әгәр кеше, Аллаһ сакласын, берәр көферлек йә ширек кылганында, йә хәмер эчкән, зина эшләгән, харам караган вакытында җан бирсә, уйлап карагыз, нинди мәсхәрәле хәлдә тергезеләчәк ул! Аллаһ Тәгәлә барыбызны да гонаһ кылып яшәүдән һәм гөнаһ өстендә үлүдән сакласын!
Кеше ялгыша, дибез. Әммә бу безне гөнаһларга җиңел карарга, гафил булырга этәрмәсен иде. Үлем фәрештәсе нинди мәлдә дә килергә мөмкин, дип уяу булыйк, Туры юлга ныграк ябышыйк, Аллаһ Тәгәләдән һәр вакыт догаларыбызда ихласлык, тәүфик һәм матур үлем сорыйк.
Мәңгелеккә сәяхәт