ТОШКЕНТ – “Аварияда соғлиғимдан ва машинамдан айрилдим, аммо суд ҳалигача тайинли қарор чиқармади”

ТОШКЕНТ. “Менинг исмим Джангиров Жасур. Тошкентнинг Шайхонтохур туманидан ёзмоқдаман. 2018 йил 30 апрель куни аварияга учрадим. Тошкент марказида, Мустақиллик майдони ёнидаги светофорнинг қизил чироғига турган эдим. Кутилмаганда жуда катта тезликда келган “Ласетти” машинамга келиб урилди. Кучли зарбдан ҳушимдан кетдим. Эртасига шифохонада ҳушимга келдим. Орадан 2-3 ой ўтгач, судга қатнай бошладим. Айбланувчи машинани тегишли ҳужжатларсиз бошқарган экан. Ўша ерда у давлат идорасида ишлашини билдим. Мана, салкам йил бўлдики, суд чўзилиб келади. Авария содир этган одам бирор марта мендан хабар олмади. Ёрдам ҳам бермади. Машинам жуда жиддий шикастланган эди. Дори-дармонга пулим қолмаганидан машинамни ўша ҳолида сотишга мажбур бўлдим. Вазият аниқ, ким айбдорлиги кундай равшан, лекин суд чўзилиб келаётганига ҳайронман. Ушбу авария сабаб соғлиғимдан, машинамдан айрилдим. Етти ойча ишлай олмадим. Докторларнинг айтишича, яна камида бир йил даволанишим керак экан. Шунча ташвиш каммиди? Яна қачонгача судма-суд юраман?!” (Бу хабар Озодликка 26 январь куни келган.)​