Zham.am/ «Կալուգայի» Սամոն՝ ընդդեմ Լևոնի, Ռոբերտի, Ծառուկյանի և Պուտինի

Ո՞վ է Սամվել Կարապետյանը: Առաջին հայացքից թվում է, թե պարզ է. ծագումով հայ ռուսաստանյան օլիգարխ, որը կարողացել է մեծ գումարներ վաստակել Ռուսաստանում և որոշակի բիզնես-հետաքրքրություն է սկսել ցուցաբերել նաև Հայաստանում: Օրեր առաջ, օրինակ, նրա քավորությամբ մեկ այլ հանրահայտ օլիգարխ Սամել Ալեքսանյանը կնքեց իր երեխաներին: Սակայն մեզ «Տաշիրի» Սամոյի բիզնես և անձնական հետաքրքրությունները, մեղմ ասած, քիչ են հետաքրքրում: Մեզ հետաքրքրում է այս մարդու բարոյական նկարագիրը, որը մի կողմից կնքահայր է դառնում Սամվել Ալեքսանյանի երեխաներին, իսկ մյուս կողմից իր աջակցության տակ գտնվող «1in.am» կայքի միջոցով իսկական տեղեկատվական արշավ սկսում նույն Սամվել Ալեքսանյանի դեմ: Մի կողմ թողնենք սույն խնդրի էթիկական կողմը, ի վերջո, սա կարող ենք համարել երկու Սամվելների անձնական խնդիրը, թեև երբ մեկը մյուսին առավոտյան ձեռք է մեկնում, իսկ երեկոյան տակից հարվածում, մեղմ ասած, դա բարոյական չէ, եթե չասենք ավելին: Իսկ երբ այդ ամենից հետո այդ երկուսը շարունակում են ձևացնել, թե ամեն ինչ նորմալ է, ապա դա ամեն ինչ ասում է և՛ մեկի, և՛ մյուսի մասին: Սակայն դա էլ մեզ քիչ է հետաքրքրում: Առավել հետաքրքրական է այն, որ Սամվել Կարապետյանի կողմից ֆինանսավորվող «1in.am»-ը լայնածավալ քարոզչական ահաբեկչություն է իրականացնում առաջին և երկրորդ նախագահների, ՀԱԿ-ի, ԲՀԿ-ի, Ռուսաստանի, Պուտինի և այլ գործիչների դեմ: Այն, որ Սամվել Կարապետյանին կարող է դուր չգալ ո՛չ Լևոն Տեր-Պետրոսյանը, ո՛չ էլ Ռոբերտ Քոչարյանը` հասկանալի է, այն, որ նրա շահերը կարող են 100 տոկոսով համընկնել Սերժ Սարգսյանի շահերի հետ` ԲՀԿ-ի ու ՀԱԿ-ի մասով, նույնպես ըմբռնելի է: Այդ դեպքում մենք էլ մեր կողմից կարող ենք հայտարարել, որ անձամբ Սամվել Կարապետյանն ու իր շրջապատը բարոյական ու քաղաքական պատասխանատվություն են կրում Սերժ և Տիգրան Սարգսյանների վարած հայաթափման քաղաքականության համար, քանզի ինքը այս «զույգին» սպասարկող գեբելսյան քարոզչամեքենայի գլխավոր հովանավորներից մեկն է` դրանից բխող բոլոր հետևանքներով: Իսկ եթե դրան գումարենք այն հանգամանքը, որ նրա կողմից ֆինանսավորվող գեբելսյան քարոզչամեքենայի գլխավոր թիրախ է հանդիսանում Ռուսաստանն ու այդ երկրի գլխավոր ղեկավարը, ապա կարող ենք արձանագրել, որ սույն անձնավորությունը Հայաստանում հակառուսական քարոզչության գլխավոր հովանավորներից մեկն է: http://zham.am/am/news/13938.html